International Tourism Mart 2022 a ṭiak ; Rin phâk bâkin a hlawhtling - Tourism official

Mizoramin a vawi khatna atana a thlen, International Tourism Mart 2022 chu November 19, Inrinni zan dar 10:30 vel khan khâr a ni. ITM 2022 hi an rin phâk aia nasaa a hlawhtlin thu Tourism department hotute chuan an sawi.

Tourism department hotute hnen aṭanga thu dawn danin, ITM 2022-ah hian Ministry of Tourism-in tel tura a bik taka a thlan, delegate an tih bik state páwn aṭangin mi 100 vel an tel a, delegate ni lo, Mizoram páwn aṭanga rawn tel mi 130 vel an awm bawk.

International Tourism Mart-ah hian November 18, Zirtawpni zing karah khan Tour de Hmuifang Cycle Rally neih niin, thirsakawr khalh ṭhin mi ṭhahnem tak an tel a, Mualpuia Zero Point aṭanga Hmuifangtlang thleng an tlân a, Tourism minister Robert Romawia'n a vailiam.

November 18 chhun khan R Dengṭhuama Hall-ah tourism kaihhnawih sumdawnna sawiho a ni a, hmarchhak state tinin an state dinhmun an sawifiah nghal a ni. Zanah Governor-in ITM 2022 hmanga rawn telte leh sawm bikte pualin Raj Bhavan-ah zanriah a buatsaih a, cultural programme hman nghal a ni.

November 19, Inrinni khan palaite chu Reiek kawnga anthurium farm tlawhpui an ni a, Reiekah indigenous games leh cultural programme hmanpui an ni. Zan lamah Lammuala ITM State Mega Exhibition fanpui an ni bawk.

Tourism department hotute chuan, ITM 2022 chu an rin phâk baka a hlawhtlin thu sawiin, "Kan rin phak aiin nasa takin a hlawhtling a, a ropui kan ti tak zet," an ti a; ITM puala Lammuala State Mega Exhibition chu ni tin mi 20,000 chuangin an tlawh anga an chhût thu an sawi.

Mizoramin ITM a thlen hmasa ber hi state páwn aṭanga rawn telte pawhin ropui an ti hle tih sawiin Tourism hotute chuan, "Mizoram páwn aṭanga rawn telte hian min fak ve nasa khawp mai. ITM neih tawh zawng zawngah a la ropui ber, an ti a, 'Engtin nge in tih theih' tiin min zawt ve hial a ni," an ti.

Tourism department hotute chuan, ITM 2022-ah hian Tourism department chu a kaihruaitu chauh an ni a, private sector lam an hmang nasa tih sawiin, chu chu a hlawhtlin viau chhan pakhat nia an hriat thu an sawi a ni.