Salvation Army ṭhalai inkhawmpui a ṭiak

Leisekawt Mual, Serchhipa Salvation Army Youth (SAY) Congress vawi 26-na chu nizan khan a ṭiak. Inkhawmpui hi November 18, Zirtawpni zan khan ṭan a ni.

India hmarchhak leh North Bengal thleng huamtu India Eastern Territory SAY Congress vawi 26-na hi Zirtawpni zan aṭang khan Leisekawt Muala pandal-ah neih a ni a, palai kal zawng zawng mi 4,500 vel niin, nimin thleng khan lehlánga chhim eng emaw zat an awm bawk.

Nimin chawhmaa thiang­hlimna inkhawmah speaker Col. Lalhmingliana, territorial commander-in thuchah a sawi a, chawhnu leh zanah Pathian biak inkhawm neih zui leh a ni.

SAY Congress hi kum 1954 khan Saitualah a vawi khatna atan neih a ni a, a tìr lamah chuan hunbi mumal tak neia hman a ni lo a, kum 1984 aṭangin kum thum danah neih a ni. Kumina inkhawmpui hi vawi 26-na a ni a, ruahmanna hmasaah chuan kum 2020-a neih tur niin, hripui léng avangin kumin hian neih a ni.

Salvation Army India Eastern Territory chhungah division pasarih - Central North Division, Central South Division, Southern Division, Western Division, Eastern Division, Northern Division leh Himalayan Division a awm a; district pakhat, Tripura district a awm bawk. SAY-ah hian member 12,871 an awm mek a ni.