Hmarchhak state zingah Mizoram hi Leibá nei tlem ber dawttu a ni - MNYF
Mizo National Youth Front (MNYF) hruaitute chuan, Mizoram chu India hmarchhak bialah sum zat leh GSDP aṭanga chhûtin leiba nei tlem ber páwl a nih thu leh, MNF sorkar chhungin GSDP aṭanga chhûta leibat zat a tlakhniam thu an sawi.
MNYF hruaitute hian November 19, Inrinni khan Aizawl Press Club-ah thuthar thehdarhtute an kâwm a; MNYF president L Thangmawia chuan, "Mizoram hian India hmarchhak state zingah a pawisa fai a ni emaw, GSDP percentage a ni emaw, kum ruk chhung data aṭangin Sikkim tih lohah chuan leiba kan nei tlem ber. Congress sorkarin GSDP percentage anga leiba 38.9% a hnutchhiah kha kum thum chhungin MNF sorkar hian 31.2%-ah a tihniam hman zawk a ni," a ti.
L Thangmawia chuan, MPCC Media hotute'n MNF sorkar kum thum chhunga leiba cheng vbc. 12,553.080-ah a pung anga an tarlan chu data an lakna a zawt a, "Kan data hmuh theih zawng zawng aṭang chuan Mizoram leiba hi vbc. 12,553.08 a la tling ngai lo," a ti a; MPCC-te'n November 17, 2022-a press conference neia Mizoram leiba chungchang an sawi dan chu thu dik lo hmanga mipui hruai kâwi tumnaah an ngai tih sawiin, thuphá chawi turin an phût tih a sawi.
Covid-19 léng avangin Mizoram sorkarin budget-ah sum hmuhna tura a ruahman lâwk tam tak a hmu pha lo nasa nia sawiin Thangmawia chuan, "Covid-19 hian nasa takin Mizoram sum leh pai dinhmun a tichhia a, hri léng vanga Mizoram sorkarin central aṭanga sum hmuh tura beisei kan hmuh phak lohna hi cheng vbc. 3,000 chuang a ni," a ti.
L Thangmawia chuan, "Mizoram sum leh pai dinhmun derthâwng taka a awm lai hian sorkar laipui chuan CSS sum pe chhuak vek turin state zawng zawng a ti bawk," a ti a; Mizoram sorkar pawhin kumin 2022 chhungin CSS sum vbc. 600 chuang a pe chhuak tawh niin a sawi.
MNYF President chuan, Congress sorkarin leiba tam tak a hnutchhiah nia sawiin, "Chuti chung leh hri léngin nasa taka min tibuai chung pawhin Chief Minister leh Finance changtu Pu Zoramthanga chuan ram sum leh pai dinhmun siamṭha turin theihtawp a chhuah a, a hmalakna zarah Mizoram leibá pawh nasa takin a tlahniam a ni," a ti.
L Thangmawia chuan, "Mizoramin sum leh paiah harsatna vàwrtàwp a tawh lai pawha sorkar hnathawkte hlawh chatlak awm hauh loa a la pe thei zel te, treasury khâr ngai loa min hruai theite hi Finance Minister-in sum leh pai a enkawl thiamzia lantirtu a ni," tiin, Finance enkawltu CM Zoramthanga an chhuan thu a sawi a ni.
MNF Ṭhalai President chuan, Lalsawta'n Finance enkawl lai, 14th Finance Commission chu a ṭhat thu leh khatih lai khan tu pawhin Finance department enkawl se, sum leh pai dinhmun a ziaawm tur thu te, Congress sorkarin kum 2015 aṭanga zu zawrh an phal avanga zu zawrh chhungin zu chhiah Rs 2,63,61,58,397 hmuh a nih thute a sawi bawk.
