Bangladesh-a Zo hnahthlakte ṭanpui turin Mizoram sorkar leh mipui ngen

Zo Reunification Organisation (ZORO) hruaitute chuan, Bangladesh-a Zo hnahthlakte dinhmun derthâwng takah a awm tih sawiin, a theih ang anga ṭanpui tur leh ṭawngṭaipui turin Mizoram sorkar leh mipui an ngen.

ZORO hruaitute chuan November 19, Inrinni khan an pisaah thuthar thehdarhtute kâwmin, Bangladesh-a Zo hnahthlakte'n harsatna an tawh chungchang an sawifiah. ZORO vice president Lalmuanpuia Punte chuan, "Bangladesh-a kan Zo hnahthlak unaute dinhmun derthâwng takah an ding mek a, mi tam tak an khuaa an awm ngam tawh loh avangin Mizoramah pawh lo ráltlân mai thei dinhmunah an ding a ni," an ti.

Lalmuanpuia Punte chuan, Bangladesh-a Zo hnahthlakte harsatna chu a theih ang anga ngaihtuah a, hma la turin Mizoram sorkar an ngen a; Mizorama pawl hrang hrangte chu beng chhí a, a theihna apianga lo ṭanpui tura an ngen bakah, ṭawngṭaipui turin Mizoram mipui an ngen bawk.

ZORO hruaitute sawi danin, Bangladesh-a Zo hnahthlakte'n an sahim nan leh anmahni puala state pek an phût a, Kuki-Chin National Army (KNA) dinin, hma an la a ni. Tribal dangte lakah dodalna nasa tak an tawh hnuah, tun hnaiah Bangladesh sipaite'n anmahnia an beih ngam loh avangin Arakan Army (AA)-te nen inremna siamin, KNA-te chu Chaihkhiang khua leh a chhehvelah bei hoin, an kâp a ni.

Bangladesh sipai leh Arakan Army-te chuan civil mite pawh an dîm lo a, nunaute pawh an nghaisa a; chuvang chuan Bangladesh-a Zo hnahthlakte chu an khuaah awm ngam loin an tlan darh mek. Hriat theih chinah Chaihkhiang khaw mi (civilian) pakua chu Arakan Army-in an man a, Bangladesh sipai hnenah an hlan rin a ni.

ZORO hruaitute chuan, Bangladesh-a Zo hnahthlakte'n harsatna lian tak an tâwk chu pawi an tih thu leh an tawrhpui thu an sawi a, "Kan unau, kan thisen zawmpui Bangladesh-a mite harsatna tawh mek hi kan en zui reng dawn a, puih an ngaihna apiangah pui turin hma kan la dawn a ni," an ti.