Ruai ṭhehnaah plastic hmang lo turin UPC (NEI)-in an kohhrante an ngen

UPC (North East India) hnuaia Aizawl East District chuan an huam chhunga tualchhung kohhran tinte hnenah lehkha thawnin, kumin Krismas leh kumthar vuakvêta ruai ṭhehnaah plastic aṭanga siam hman khat daih thilte hmang lo turin an ngen.

UPC (NEI) Aizawl East District chuan an lehkhaah hian, hman khat daih sarâng (single use plastic)-te chu mihring hriselna khawih pawi thei leh sik leh sa a ṭha lo zawnga nghawng theih a nih thu leh, sorkarin July 1, 2022 aṭangin a khap thu an tarlang.

UPC (NEI) Aizawl East District chuan, "Kumin 2022 Krismas leh kumthar vuakvêta ruai kan buatsaih turah hman phal loh single use plastic-te hmang tawh lo turin AMC-in min ngen a. Min ngen ang hian, tualchhung kohhran tinte'n ngai pawimawha hmang lo hrâm turin kan inngenin kan hriattir a ni," tiin an kohhran mite an chah a ni.