Corporation, board leh society-te an thua thawktu la lo tura tih an ni

Finance department chuan tunhnai khan office memorandum tichhuakin, Mizoram sorkar hnuaia corpo­ration, board leh society-te chu anmahni thua thawktu la thar tawh lo turin a hriattir.

Corporation, board leh society-te hian mahni thua post siam chawpin, Governing Board remtihnain hna an lak thar ṭhin thu tarlangin Finance department chuan, "Hei avang hian Finance department-ah fund dil belh ṭhin a ni a, Finance department chu dinhmun khirhkhàn taka a awm ṭhin phah a ni. Hei hi sorkarin a ngai thutak tak zet," an ti.

Finance department tarlan danin, Mizoram sorkarin hlawh a pek corporation, board leh society-te chu Finance department aṭanga pawmpuina fel tak an neih loh chuan thawktu la tawh lo tura tih an ni a; an la lui a nih chuan hlawh tur pek an ni tawh dawn lo.