Mizoramin ram hruaitu ṭha a mamawh - MLA Lalrindika

MLA Lalrindika Ralte chuan November 19, Inrinni khan a biala West Bunghmun community hall-ah thu sawiin, Mizoramah thil dik lo tite an inthlahrun loh tâk hle thu leh, Mizoramin ram hruaitu ṭha a mamawh thu a sawi.

Lalrindika Ralte chuan, ram kaihhruainaah theihna sang ber hlan a ngaih thu sawiin, "Kan ram kaihhruainaah hian dik leh rinawmna khawiah nge a awm? Thil dik lo titute an inthlahrung ta lo khawp mai. Sorkarna siamtute hi mipui kan ni a, chuvangin, inthlanna hi kan ngaih pawimawh a ngai a, kan ti mai mai tur a ni lo. Ram hruaitu mi ṭha kan mamawh a ni," a ti.

Sorkar ṭha nei turin mipuite'n mawhphurhna an nei tih sawiin Lalrindika chuan, "Mahni chhia leh ṭha hriatna hmang thei lo nih i tum lo ang u. Kohhran te, kut hnathawktute zawng zawngte pawhina kan mamawh chu sorkar ṭha a ni a, ram leh mipui hmasawnna chu mipuite kutah a awm," a ti a; mi retheite'n sorkar ṭha an mamawh zual thu a sawi.

Lalrindika Ralte chuan, nakkumah inthlanpui a awm dawn tih sawiin, "Eng ang sorkar nge kan din leh dawn? Mahni hmasial, dik lote hnâwl ngam turin chakna kan nei. Mi dik lote kan hnâwl ngam lo a nih chuan kan hma lam hun a thim khawp ang. Kan ram leh hnam dinhmun hi siamṭhat theih loh a ni lo a, beidawng mai tur kan ni lo; thlak danglam tura kan thawh erawh a ngai," a ti.

Hachhek bialtu MLA chuan, khawvel ropuina leh hausakna a thlahlel lo tih sawiin, "MLA kan ni a, ṭhenkhatin 'sir' min ti a, sir tia inkoh hi a ṭul lo. Sir tiin min ko u la, kan ramin hma a sawn si loh chuan eng tihna mah a ni lo. Kan ramin hma a sawn a nih phawt chuan ka hming pawhin min ko u la, ka lawm em em ang," a ti a; ramin hma a sawn phawt a ṭul thu a sawi.