Champhaiah lirthei chetsualna thlen tamna hmuna hmalakna tur duang

November 19, Inrinni khan Champhai DC James Lalrinchhana hoin New Champhai leh Zotlang inkar kawngpuia lirthei chetsual tamna laia hmalak dan tur enfiah a ni a, hmalakna tur hrang hrang an duang.

New Champhai leh Zotlang inkar kawngpui kual laiah hian tun hnaiah bike accident avangin mi pathum an thi a; chhinchhiah theih chinah, kawngpui siamṭhat a nih hnuah lirthei chetsualna avangin mi 10 vel an thi tawh a ni.

PWD engineer-te sawi danin, kawng kual lai chu a san zawng leh a kual danah lirthei paih chhuak zawngin a awm lo a, lirthei tlân chak zawng darkar khata km. 40 vel ni turin kawng kual lai siam a ni.

Darkar khata km. 40 aia chaka tlân chuan kawng kualah lirthei chetsual a hlauhawm ṭhin a; lirthei chetsualna tam ber chu tlân chak vanga a kual laia kawi zawh tak loh vang nia an rin thu PWD engineer-te chuan an sawi.

New Champhai leh Zotlang inkar kawng kual laiah hian lirthei an tlan muan theih nan leh a khalhtute fimkhur theihna turin rumble trip, cautionary board, catch eye delineator leh reflector-te bel leh, accident barrier (tlâk dâl) dah an rél a; speed breaker awmah lirthei khalhtute hmuh awlsam zawkna tur dah ni se, an ti.

Kawng enfiahnaah hian PWD engineer te, BRTF hotu te, Champhai Sub-Hqrs. YMA hruaitute leh VC aiawhte an tel a ni.