Hripui vei district 3-ah mi 22 an awm

Mizoramah Covid-19 vei November 18, Zirtawpni khan mi panga leh November 19, Inrinni khan mi pahnih hmuh chhuah a ni. Nimin tlai khan Covid-19 positive enkawl lai mi 22 awm mekin, district pathuma mite an ni.

IDSP aṭanga thu dawn danin, November 18-a Covid-19 vei hmuh chhuahte chu Aizawl district-ah mi pathum leh Lunglei district-a mi pahnih an ni a, swab sample 98 endik niin, positivity rate 5.10% a ni. Inrinnia hripui vei hmuh belh mi pahnihte chu Aizawl district-a mi an ni a, sample 57 endik niin, positivity rate 3.51% a ni.

November 19, Inrinni khan Covid-19 vei dam tawh mi pahnih an chhuak a, nimin khan mi pahnih an chhuak bawk.

Mizoramah swab sample 19,90,751 endik tawh niin, Covid-19 vei 2,38,939 hmuh chhuah a ni tawh a, a pumpuia positivity rate 12% a ni. Nimin tlai dar 3 thlengin mi 2,38,191 (99.69%) chhuahtir an ni tawh a, mi 726 (0.30%) thi tawhin, enkawl mek mi 19 (0.01%) an awm.

Nimin tlai dinhmun angin, Covid-19 positive Aizawl district-ah mi 14 leh Lunglei leh Mamit district-ah mi pali ve ve an awm mek a; district dang pariatah an awm tawh rih lo thung.