CM ber sumah a thla a la muang Sorkar hnathawk hlawh cut tum ṭhulh ni se - Duhoma

Lalduhoma hian nimin khan thuchah (statement) a tichhuak a; CM-in Mizoram rorelna sang berah February 25, 2020 khan kar khat chhunga state budget páwn lam aṭanga sum an hmuh chu vbc. 5,000 a tlin thu a sawi tih tarlangin, "Jal Shakti Minister-in rawn pek a tum phei chu sawi zahthlak khawpa tam a nih avangin a sawi ta lo a nih kha. Kha nen khan engzat nge ni ang kan hre phak ve tawh lo. Kan sum dinhmun en hian a thlamuanthlak hle," a ti.

Tunlaia mipui thu chai ber chu Speaker leh Chief Secretary-te bultuma Covid-19 dona sum tuak thu a ni tih sawiin Lalduhoma chuan, "He thil hi Speaker leh Chief Secretary-te kaltlanga sorkar hmalaknaah ngaih loh theih a ni lo. Sorkar hi a mangang a, min ngen a nih chuan tute mah hi kan tlanchhiat ka ring lo," a ti a; tun thlenga sorkarin an mangan thu emaw, ngenna emaw an sawi si loh avangin, "Midang tibuai tawh rih loin, sorkar hnathawkte hlawh cut sak tum pawh ṭhulh ni se," a ti a, harsatna kan tawk zui a nih chuan a tlachawpa ngaihtuah ṭhat ni se a duh thu a sawi.

ZLP Leader chuan, Mizoram sorkarin nikuma sum a hmuh la hman loh leh kumina a hmuh chu cheng vbc. 882.37 a nih thu sawiin, "Kumina kan state-in kan deh chhuah ve tur hi chu cheng vbc. 1,244 a ni a, heta ṭang hian eng emaw zat a lut tawh ang. Tata Trust, Manish Mundra leh pawl leh mimal ṭhahnemngaite aṭangin thilpek kan dawng nual. India Today-in a tarlan danin, Mizorama tangkhangte zinga 88.5% chu NGO-te enkawl an ni," a ti.

Duhoma chuan, sum a tam laiin Covid-19 dona atana Health department hnena pek tawh zat chu May 7, 2020 thlengin cheng vbc. 19.57 chauh a nih thu sawiin, "Heta ṭang hian hman bâng cheng nuai 91.5 an la nei a, May 5 thleng khan CMRF aṭangin hman bâng cheng nuai 207.4 lai a la awm bawk. February 27, 2020-a budget session-ah khan Health Minister khan Covid-19 do nan cheng 132 a dil thu a sawi," a ti a; Health Minister dilna chu Finance department-in an hnâwl nia sawiin, pawi a tih thu a sawi. 

Sum hman dan aṭangin Mizoram chu sum­ah a harsa vak lo tih a lan thu sawiin Duhoma chuan, “NEC-in cheng vbc. 3  min pek pawh kha Finance department-in an thu lo chuan lo hmang lo turin Health department a hriattir. DoNER minister Dr Jitendra Singh an video conference a neih khan, Mizoram chuan cheng khat mah an la hmang lo tih leh utilisation certificate an la thehlut lo tih a hriatin a lâwm lo hle a; Mizoramin sum kan mamawh ve loah min ngaih phah a ni,” a ti.

ZLP Leader chuan, mi dang tana phurrit siam hmain sorkarin tih hmasak tur a neih thu sawiin, “Inrenchemna a kalpui phawt tur a ni. Budget-ah hian zin veivah nan cheng vbc. 23.54 dah a ni a, minister zingah motor pali lai kawlte an la awm. Hemi head hnuaiah hian sum tam tak save theih a awm ngei ang. Office expenditure atana cheng vbc. 50 lai dah aṭang pawhin kan hum ṭeuh thei ang,” a ti a; project kalpui remchang rih lo a tam avangin capital expenditure-a sum dah cheng vbc. 930 aṭang pawhin tam tak hum theih a nih tur thu a sawi.

SEDP atana board 14 dinte pawhin mipui mit a timîm ṭan tawh tih sawiin Lalduhoma chuan, “Sorkar hian inrenchemna ṭha tak a duan phawt chuan, mi dang tibuai tawh loin kan kal theih a rinawm. A ṭul chuan FRBM Act hnuaiah pawh vaibelchhe tél kan la pûk belh thei. Covid-19 atana sum thawh khawm hi party induhsak nan te, vote zawn nan leh campaign nan hman kan phal lo. Mipui hriat theih tura langtlang taka vawn ngei ni se kan duh a ni,” a ti.

        Lalduhoma thusawi Ṭhenkhat

•    Sorkar a mangang a, min ngen a nih chuan tute mah kan tlanchhiat ka ring lo. Tun thlengin mangan thu emaw, ngenna an sawi lo.

•    Health Minister-in Covid-19 dona atana dil cheng vbc. 132 hnâwl a ni pawi ka ti hle.

•    Mi dang tana phurrit siam hmain sorkarin inrenchemna a kalpui phawt tur a ni.

•    Budget-ah zin veivahna atan cheng vbc. 23.54 dah a ni a, minister zingah motor pali kawlte an la awm.

•    SEDP board pali dinte pawhin mipui mit a timîm tawh.

•    Covid-19 dona atana Speaker leh Chief Secretary bultuma sum tuak hi anni kaltlanga sorkar hmalaknaah a ngaih loh theih loh.

May 2019    National Bamboo Mission    vbc. 7.92 

(La hman loh niin a lang)

March 17 & 23, 2020    Loan pûk tur    vbc. 360.00

April 1, 2020    NEC    vbc. 3.00

April 3 & 4, 2020    State Disaster Response Fund    vbc. 23.50

April 3 & 4, 2020    Revenue Deficit Grant    vbc. 23.50

April 21, 2020    Loan pûk tur    vbc. 100

(A chunga tarlan bakah hian hmuh hun tarlan loh, tax devolution aṭangin vbc. 232.96, NHM aṭangin vbc. 7.88, labour cess aṭangin vbc. 21 leh CM Relief Fund aṭangin vbc. 7.56-te a tel)