Sialhâwk khuain lakhuihthei hmanga wine siam phal turin Mizoram sorkar an ngen
Sialhâwk khawtlang hruaitute chuan, lakhuihthei hmanga wine siam phal turin Mizoram sorkarah ngenna an thlen. Sialhawk hian kuminah October thla thlengin lakhuihthei cheng nuai 274 man an hralh tawh a ni.
Sialhawk aṭanga Vanglaini thu dawn danin, Sialhawk VC-te chuan lakhuihthei aṭanga wine siam phal a nih theih nan Excise & Narcotics Minister hnenah tun hnai khan ngenna an thlen a; an ngenna chungchangah sorkar aṭangin chhànna an la dawng lo.
Lakhuihthei aṭanga wine siam an duh chhan chu, hlâwk zawka an lakhuihthei tharte an hralh thei dawna an hriat vang a ni a; sorkarin wine siam a phal a nih chuan tuna an hralhna aia a lêta man to zawkin an hralh thei dawn a ni.
Sialhawk khuaah hian tun dinhmunah chuan wine siamna khawl awm lo mah se, Mizoramah lakhuihthei hmanga wine siam thei an awm. Chu'ng mite thuràwn ang chuan lakhuihthei hmanga wine siam phal turin sorkar an dil a ni. Sorkarin a remtih chuan, wine siam theite'n lakhuihtheite an lei dawn a ni.
Vanglaini palai zawhna chhangin Excise & Narcotics minister Dr K Beichhua chuan, Sialhawk khawtlang hruaitute ngenna chu an la ngaihtuah loh thu a sawi a, "Tun dinhmunah chuan wine chungchangah hian grape wine bak siam phal a ni lo," a ti.
Tualte Tomato Growers Cooperative Society hruaitute hnen aṭanga thu dawn danin, Tualte khua hian kum 2019 aṭangin tomato an chíng ṭan a, tunah chhungkaw 233-in an chíng. Tomato cheng vbc. 5.48 man an hralh tawh a, kumin bikah October thlengin cheng nuai 274 man an hralh tawh a ni.