July-October inkara lei laih khapna thupek zâwm lo mi 21 an awm

Aizawl Municipal Corporation (AMC)-in fùr laia lei laih vanga chhiatna a thlen lohna tura kumin July-October chhung AMC huam chhunga lei laih leh leivûng hmanga ruam/kawr chhùn khah a khapna thupek chu zâwm lo mi 21 an awm.

Vanglaini palai zawhna chhangin AMC hotute chuan, khapna thupek chu Aizawl mipuiin an zâwm ṭha thawkhata an hriat thu an sawi a, "Chutih rualin, khapna thupek zâwm lo mi eng emaw zat kan hmu chhuak a, dan angin pawisa chawi tur leh an hna thawh lai chhunzawm lo turin kan hriattir ṭhin. Sorkar project ṭhenkhat, hnathawh hun bituk nei leh hmanhmawh thlak zualte erawh ngaihhnathiam kan nei nual bawk," an ti.

Khapna thupek chuan zawm a hlawh thawkhat avangin kum dang angin fûr laia in hmun laih min leh mi dang tana hlauhawm theia lei khî a awm meuh lo nia an hriat thu an sawi bawk.

AMC hian kumin July-October inkara lei laih khapna thupek an lekkawh chhungin dan bawhchhia mi 21 an man a, Rs 5,000 ṭheuh chawi tura tih an ni. Hriat theih chinah mi 21 zinga mi pakuain an pawisa chawi tur an pe tawh a, pawisa chawi tur la pe lo mi 12 an awm.

Khapna thupek bawhchhiate chu leivûng an paih zat cubic meter azirin pawisa chawitir theih a ni a; cubic meter 500 hnuai lamah Rs 5,000, cu.m. 500-1,000 inkarah Rs 10,000 leh cu.m. 1,000 chung lamah chuan cubic meter khatah Rs 5 zelin a pung a ni.