Kumin chhungin Champhai district-ah ruihhlo cheng nuai 3,894.73 hû man tawh

Champhai District Narco Coordination Committee chu nimin khan an chairman James Lalrinchhana, district bawrhsap hoin DC conference hall-ah an ṭhukhawm. Kuminah nimin thleng khan Cham­phai district-ah ruihhlo cheng nuai 3,894.73 hû man a ni a, mi 164 man niin, chu'ng zinga 44 chu ram dang mi an nih thu an tarlang.

Kumin January 1 aṭanga nimin November 21 thleng khan Cham­phai police-te'n heroin kg 27.329 (hawng 2,102.23), tualchhunga hralhna angin cheng nuai 630.67 man te, methamphetamine mûm 8,18,500 (kg. 84.05), cheng nuai 1,637 man leh, pseudoephedrine mûm 1,80,000 (kg. 28.80), cheng nuai 126 hû an man.

Champhai police-in kumina ruihhlo an man zawng zawng chu cheng nuai 2,393.67 hû a ni a; ruihhlo kaihhawihah NDPS Act tlawhchhanin thubuai 80 ziah luh a ni. Ruihhlo kaihhnawihah mi 104 man a ni a, chu'ng zinga mi 27 chu ram dang mi (foreigner) an ni.

Kumin chhung vêkin Champhaia Excise & Narcotics department-in hnuaiah tualchhung rate-a cheng nuai 103.37 hû heroin kg. 8.614, nuai 1,397 hu methamphetamine mûm 4,65,700, Rs 53,396 hû pseudoephedrine mûm 8,896, Rs 3,840 man ganja kg. 3.2 leh, Rs 2,180 hû alprazolam mûm 218 an man.

END-in ruihhlo an man zawng zawng hlut zawng chu cheng nuai 1,501.06 a ni a; ruihhlo man kaihhnawihah mi 60 manin, NDPS Act tlawhchhanin thubuai 54 an ziak lut a, mi 60 man zinga 17 chu ram dang mi an ni.

Ṭhutkhawmah hian, ruihhlo tawlh leh zuar an mante dan ang taka an phû tâwka hrem zel an nih theih nan leh pawikhawih nawn ṭhinte ven kawnga ṭan lak ngaihnate an sawiho a; ruihhlo ngaite leh ruihhlo vanga mante thubuai neih dan leh chinfel lohte zirchianna an rél.

Tun hma zawng aiin Myanmar rambuai avangin ruihhlo tawlh a tam zual thu te, ruihhlo do leh man kawnga force mite leh YMA-te thawhrimna chhuanawm an tih thu te, thâ thlah loa theihtawp chhuah zel a pawimawh thute an sawi a ni.