All India Cooperative Week khâr

Lunglei District Cooperative Union (LDCU)-in All India Cooperative Week vawi 69-na an hman chu nimin khan Lunglei Art & Culture conference hall-ah khâr a ni a, Cooperation minister C Lalrinsanga'n a hmanpui. Week thupui chu, 'India @75: Growth of cooperatives and future ahead' tih a ni.

Week khârna inkhawm hi LDCU president RVL Chhuanga'n a kaihruai a; LDCU president leh vice president ni tawhte chawimawi an hlân. MAHFED chairman Vanlalruata leh managing director Ngurthansanga Sailo te, Community Institution & Rural Livelihood expert MC Zomuana, NABARD DDM Evan T Munsong leh DRDO work manager Ramnunsanga ten paper an buatsaihte an sawi a ni.

Minister C Lalrinsanga chuan, cooperative-te kaltlanga hmalaknate'n Mizoram economy bulṭhut aṭangin a nghawng nia sawiin, hmasawnna daih rei leh mipui tana chhenfâkawm thlen theitu a nih thu a sawi a; cooperative movement tan theihtawp chhuah zel turin LDCU hruaitute leh department thawktute a ngen.

C Lalrinsanga chuan, Mizoramah cooperative movement chak taka kalpui zel turin hmalak mek a nih thu sawiin, "Mi harsa zawkte'n in leh lo an neih theihna turin cooperative kaltlanga hmalakna Housing Federation kalpui leh tura hmalak mek a ni," a ti a; cooperative federation leh union hruaitute chu mipui mimir hmasawnna dah pawimawh tlat tur leh rinawm leh taima taka mipui tan thawk turin a chah a ni.