Kan goal, kan policy leh kan leader-te ZPM-in kan zuar - ZPM Vice President

ZPM vice president Dr Kenneth Chawngliana chuan nimin khan an party pisaah thu sawiin, ZPM party-in thil pathum - an goal, an policy leh an leader-te an zawrh thu a sawi.

Dr Kenneth Chawngliana chuan, an tum chu kalphung thar hmanga mipui sorkar siam a ni tih a sawi a, "ZPM hian thil pathum kan zuar a, chu'ngte chu - kan goal, kan policy leh kan leader-te an ni," a ti.

Kalphung thar ziarâng sawiin Kenneth Chawngliana chuan, "Party hi mi pakhata thuneihna búrbun lo a, thuneihna inṭâwm hmanga kaihhruai te, mi pakhat term hnih bak chief minister an ni thei lo ang tih te, CM-in work department a khawih lo ang tih te, Val Upa Council (VUC) uapna hnuaia party leh sorkar kalpui te, dan rorelna tun din te, langtlang sorkar siamte a ni," a ti a; mi rethei zawkte'n hma nan sawn theih nan hma a lak dawn thu a sawi.

ZPM Vice President chuan, an party policy an tlangzarh tawhah ram kaihhruai an tum dan leh ram hmasawnna hna thawh an tum dan duan a awm vek tih a sawi a; an policy chu lo zir chiang a, policy chu ZPM sorkar tehfunga hmang turin mipui a sáwm a ni.

Goal leh policy chu eng anga ṭha pawh ni se, Mizoramin hruaitu ṭha neih a ngai tih sawiin Kenneth Chawngliana chuan, "Mi bik, chawimawi hlawh, mahni tuma chiang, eiru lo bera thlan, sorkar kalhmang hria leh Assembly rorel thiam leader Pu Lalduhoma kan nei hi kan vannei hle," a ti. Tunlaiin sorkar siam tum loa campaign an awm nia sawiin, "Heng mite hi ZPM zara sorkara tel tum an ni tih mipuite'n hria se kan duh," a ti bawk.