Congress sorkarah treasury vawi 30 chuang khàr a ni - MNF Vice President

MNF vice president Lal-thlengliana chuan nimin khan Mizo Hnam Rûna inkhawmah thu sawiin, Congress sorkar laiin sorkar treasury vawi 30 chuang khàr a nih thu a sawi a; chief minister Zoramthanga tluka Finance enkawl thiam Mizoramah an la awm lo niin a sawi bawk.

Lalthlengliana chuan, tun hnaiah Congress party hoin an ngûm khâk hmu loin sum harsatna chungchangah MNF an bei niin a sawi a, "An (Congress) hun lai khan sorkarin sum a neih loh avangin treasury vawi 30 chuang an khâr. Sum an harsat avangin kum 2012-2015 chhung khan RBI aṭangin cheng vbc. 1,331.61 an pûk a, Congress sorkar khan MNF sorkar thar hi leibá cheng vbc. 7,300 chuang min hnutchhhiah," a ti.

MNF Vice President hian, Congress sorkarin NLUP atan state plan fund an hman avangin CSS sum tam tak matching share an pek theih loh avangin a kìr phah thu te, May 25, 2017-a CAG audit report pharhah NLUP thiltum a hlawhchham tih a nih thu te, Congress sorkarah sum awm loh vangin Hindi zirtirtu 1,300 chuang, EFCC department-ah mi 200 chuang, RMSA clerk 81 leh labotarory attendent 280 chuang bàn an nih thute a sawi a ni.

Lalthlengliana chuan, "Chief minister Pu Zoramthanga tluka Finance enkawl thiam Mizoramah an la awm lo. Kum 1998 khan Congress sorkarin cheng vaibelchhe tam tak leiba min hnutchhiah chungin bul a ṭan a, PM hnenah peace bonus vbc. 182.45 a dil chhuak. BAFFACOS-ah vaibelchhe tam tak sawi chhuakin, awm lo ata ama remhriatnain bul a ṭan. MNF sorkar hmasa chhung khan treasury khâr a awm ve lo," a ti.