National Technology Day hmang
Nimin khan Science & Technology chuan an conference hall-ah National Technology Day an hmang a, Planning secretary Dr C Vanlalramsanga'n hmanpuiin, Science & Technology chu a pawimawh a, Mizote'n hma an sawn zel a ṭul avangin Science & Technology directorate-a thawkte hmasawn zel turin a fuih.
Dr C Vanlalramsanga chuan, Covid-19 vanga buaina leh inkharkhip kal mek chu nasa zawka zir bingna atan remchangah hmang a, Mizoram chhung bika harsatna thleng theite Science & Technology hmanga sutkian theih dan tur ngaihtuah turin a fuih a ni. MISTIC scientist-te buatsaih lehkhabu pathum a tlangzarh nghal.
National Technology Day hmanna inkhawm hi chief scientific officer Dr RK Lallianthanga'n a kaihruai a; principal scientific officer H Lalsawmliana'n National Technology Day chanchin sawiin, senior scientific officer Samuel Lalmalsawma'n lehkhabu pathum tlangzarhte chungchang a sawifiah thung.
National Technology Day hi May 11, 1998-a Rajasthan-a Pokhran thlalêra India-in hlawhtling taka nuclear a enchhin hriatrengna leh science leh technology lam mite infuih tharna ní atan ram pumah hman ṭhin a ni.