Tawnhriat ngah aiin intiamna tipuitling ṭhin kan mamawh zawk - BJP President

BJP, Mizoram Pradesh president Vanlalhmuaka chuan nimin khan an party pisaah thu sawiin, "Mizoram hian politics-a tawnhriat ngah aiin mipui hmaa intiamna tipuitling ṭhin hruaitu leh party kan mamawh zawk," a ti.

Vanlalhmuaka chuan, politics-a tawnhriat ngah aiin mipui hnena intiamna tipuitling ṭhin party leh hruaitu ramin a mamawh zawk a, mahse, chutiang chu Mizoramin state a nih hnuah hmuh tur an la nei loh thu a sawi a, "Mipui hmaa intiamna hlen ṭhin party leh hma la ṭhin party chu BJP, Pu Narendra kaihhruai hi a ni," a ti a; Mizoramah BJP an sorkar a ngaih thu a sawi.

Mizoram BJP President chuan, Mizorama kuhva chíngtute buaina chungchang sawiin, "Mizorama kuhva chíngtute buaina leh harsatna chinfel dan Mizoram sorkar hian a hre lo a ni lo a, a chingfel duh loh zawk a ni. Chingfel duh ni se, Burma aṭanga kuhva ro kudam, dan loa lak luh Mamit, Kolasib leh Champhai district-a mite man vek se, ni khat thil thuah buaina chinfel nghal a ni ang. Mawhphurtu dik tak chu Mizoram sorkar a ni," a ti.

National highway zauh tura zangnadawmna chungchangah Revenue leh Forest lama buainain hnathawh tur an ti-khaihlak nasa tih sawiin Vanlalhmuaka chuan, "He buaina chungchangah hian state sorkarin a mawh la ngam lo a, mipuite chu kal ngaihna hre loin a siam a ni berm," a ti a; November 11, 2022-a MoRTH minister Gadkari hoa meeting-ah kawngpui siam hna tikhaihlak lo turin state sorkar a hriattir thu a sawi.

Vanlalhmuaka chuan, Mizoramin Mizoram tana pa ni ngam, mawhphurhna la ngam, thil ti tak tak ngam a mamawh thu a sawi a, "Mawhphurhna la ngam awm chhun chu BJP hi kan ni. Kum 2023 inthlanah Mizoramah Pu Modi-a kaihhruai BJP sorkar a piang dawn," a ti.