ITM hlawhtlinnaah MNYF an lawm

MNF ṭhalaite chuan thuchhuah siamin, Mizoram sorkarin November 16-19, 2022 chhunga International Tourism Mart (ITM) leh State Mega Exhibition cum Food Festivals hlawhtling taka a thleng leh a buatsaih chu lawmawm an tih thu an tarlang a, chhimtu zawng zawng chungah lawmthu an sawi.

MNYF chuan, ITM State Mega Exhibition cum Food Festivals chhimtu zingah nungchang mawi lo leh rûi buai hmuh tur a awm lo nia sawiin, "Ṭhalaite kan changkàn tawh zia tilangtuah kan ngai a, nunaute pawh thlamuang takin an awm theih phah a, Mizo ṭhalaite chungah pawh lawmthu kan sawi mawlh mawlh a ni," an ti.

ITM thlen leh Mega Exhibition huaihawt a nih theihna tura hma latu chief minister Zoramthanga leh Tourism minister Robert Romawia Royte te, Tourism department-a thawktute inpekna an chhuan thu MNYF chuan an tarlang.

MNF ṭhalaite chuan, Sports minister Robert Romawia chu All India Football Federation (AIFF)-in World Cup hawnnaa tel tura ticket a ruahmansak zingah a tel nia sawiin, "AIFF-in ticket a ruahmansak zinga a tel pha hi a lawmawm kan ti hle. Sorkar sum tihek miah loa a mimal sum sénga Qatar a kal hi hun kal tate ngaihtuahin a chhuanawm kan ti hle a ni," an ti.