Sorkar hnathawk hlawh a hun taka pe turin MPYCC-in sorkar an phût

Mizoram Pradesh Youth Congress Committee (MPYCC) chuan thuchhuah siamin, Mizoram sorkar chu a hun takah sorkar hnathawkte hlawh pe turin an phût.

MPYCC chuan, Mizoram sorkarin a hnuaia thawkte hlawh a hun takah a pe ngai ta lo tih tarlangin, "A pawi kan tiin, zahthlak kan ti hle. Tlai taka hlawh a pe chhuak ṭhin hian sorkar hnathawkte dikna leh chanvo a rapbet nasa em em a ni. Loan la tan phei chuan phurrit a siam a, pawisa an chawi belh (penalty) ṭhin a, sum enkawl thiam lo MNF sorkar kan hrawn mek hi vanduaithlak kan ti tak zet," an ti.

MPYCC-in RTI Act hmanga an zawhna chhannaa a lan danin, Mizoram leibá chu cheng vbc. 12,553.08 (2022-23 budget estimate)-ah a pung chho tawh tih sawiin MPYCC, "MNF sorkar hnu kum thum vel chhunga Mizoram leiba a lêt dawna a pung chho hi a manganthlak tak zet a ni," an ti a; ṭhangtharte'n sorkarna chelh mektu MNF party an la dem hlea an rin thu an tarlang.

Congress ṭhalaite chuan, local council leh village council-te lawmman pawh Mizoram sorkarin thla sarih chhung, April 2022 aṭangin a batsak tawh tih an tarlang a, "Mahni hna ṭul dangte kalsan a, khawtlang tana thawktute chanvo rahbehsaknaah kan ngai a, a rang thei ang bera VC/LC-te hlawh pe turin Mizoram sorkar kan phût a ni," an ti.