MSU-in BSF chêt dan an dem

Mizo Students' Union (MSU) Gen. Hqrs chuan, November 20, Pathianni chawhnu lama Parva khua leh a chhehvela Arakan Army leh Bangladesh sipaite ṭangrualin Kuki Chin National Army (KNA) an kah avanga sahimna zawnga Bangladesh-a Zo hnahthlak, Mizorama luh tumte Border Security Force (BSF)-te'n an lo dang vek chu an dem thu an tarlang.

MSU chuan thuchhuah siamin, Bangladesh sipaite leh Arakan Army-te'n Bangladesh-a Zo hnahthlakte pawl din, KNA-te an bei leh chumi avanga Zo hnathlakte'n harsatna an tâwk chu an dem thu an tarlang a, "Sahimna zawnga Zo hnahthlak Mizorama luh tumte BSF-te'n an manganna hriatthiampui lo a, nunau leh kum upa zawkte pawh thliar loa an lo dang vek mai hi kan a dem hle a ni," an ti.

Bangladesh-a Zo hnahthlak buaina tawk mekte'n Mizoram chhungah a rang thei ang bera inhumhimna an hmuh vat theih nan harsatna siamsak lo turin MSU chuan paramilitary force-te an ngen a; harsatna tâwk mekte tan an himna ngaihtuahsak thuai tur leh an harsatna a rang thei ang bera chinfel a nih theih nan hma la turin Mizoram sorkar an phût a ni.