KHAWTHLIR

Hun pawtsei
National Food Security Act, 2013 hnuaia retailer-te kaltlanga subsidy-a buhfai dawngtu, ration card neitute tana ration card leh Aadhaar card thlun zawm theih hun hnuhnung chu December 31, 2022 thleng pawhsei a ni. Hriattirna tihchhuah hmasakah chuan ration card leh Aadhaar card thlun zawm hun hnuhnung chu September 9, 2022 a ni.

Champha lawm
Mizoram University-a Central Library chuan nimin khan kum 42 tlin champha an lawm a, MZU vice chancellor mawhphurhna la mektu Prof. Pravakar Rath khuallian a ni. MZU librarian Dr Lalremsiami'n MZU Library kum 1980-a a din chhoh dan leh hmasawnna dante a sawi a; MZU vice chancellor lo ni tawh ṭhin Prof. R Lalthantluanga, Prof. Darchhawna (padma shri) leh professor chàwl tawh dangte'n an hmanpui a ni.

MLA-in vailiam
Krishi Vigyan Kendra (KVK), Lengpui, Mamit district-in India International Trade Fair (IITF) tlawh tur leh Agri-preneurship under capacity building for adoption of technology hnuaia New Delhi-a tel tura loneitu 20 a tirhte chu nimin khan Mamit bialtu MLA H Lalzirliana'n KVK, Lengpui office aṭangin a vailiam. MLA hian Lengpuia Hnam Chhantu hmunhma a tlawh bawk.

Hâlpuah man
Mizoram police-a Aizawl District Special Branch leh Bawngkawn Police Station-a mite chuan nimin chawhnu khan Aizawlah hâlpuah leh hâlmawi chi hrang hrang, Rs 68,000 hû vel an man a; a neitu H Lalruatkima (36) s/o H Lalhmingthanga, Ṭhuampui an man nghal a, a lakah thubuai ziah luh a ni.

Table top excercise
Serchhip bawrhsap Nazuk Kumar kaihhruaiin nimin khan DC meeting hall-ah vawiina disaster mock drill neih dan tur enlâwkna leh zirhona, Table Top Excercise neih a ni. Mockdrill hi lirnghing magnitude 7.1 velin Serchhip khawpui a sâwi a, mi 25 aia tam thi ang leh mi 50 chuang hliam ang kara chhanchhuah hna thawh dan tur tihchhinna a ni.