Hripui vei district 2-ah chiah an awm

November 20, Pathianni khan Mizoramah Covid-19 vei mi pakhat hmuh chhuah a ni. Nimin khan hripui vei enkawl lai mi panga an chhuak a, nimin tlai khan positive enkawl lai district pahnihah chiah awmin, mi 18 an awm mek.

IDSP aṭanga thu dawn danin, November 20-a Covid-19 vei hmuh chhuah awm chhun chu Lunglei district-a mi a ni a; swab sample 40 endik niin, positivity rate 2.5% a ni.

Mizoramah swab sample 19,90,791 endik tawh niin, Covid-19 vei 2,38,940 hmuh chhuah a ni tawh a, a pumpuia positivity rate 12% a ni. Nimin tlai dar 3 thlengin mi 2,38,196 (99.69%) chhuahtir an ni tawh a, mi 726 (0.30%) thi tawhin, enkawl mek mi 18 (0.01%) an awm.

Nimin tlai dinhmun angin, Mizorama district pahnihah chiah Covid-19 positive enkawl lai an awm a, district dang zawngah positive an awm lo. Hripui vei enkawl lai awmnate chu - Aizawl district-ah mi 14 leh Lunglei district-ah mi pali an ni.