NEC pek nuai 300 chungchang sawifiah

Health & Family Welfare (HFW) department chuan Covid-19 dona atana National Health Mission (NHM), Mizoamin North Eastern Council (NEC) aṭanga cheng nuai 300 a hmuh chungchang an sawifiah. Sum hmanna tura mumal taka duan a nih thu te, ṭangkai taka hman a nih theih nan chak taka hmalak a nih thu leh, hun bituk chhungin a hmanna tur dik takah hman a nih dawn thu an tarlang.

HFW tarlan danin, Covid-19 dona atana NEC-in Mizoram sorkara cheng nuai 300 a pekah March 30, 2020-ah NEC-in sanction order a tichhuak a, April 1-ah release order a tichhuak leh a, April 4-ah Mizoram NHM account-ah thun a ni. Planning department-in Health department a hriattir dan chuan, cheng nuai 300 chu NEC-in a pek aṭanga thla hnih (May thla tawp) chhunga hman zawh tur a ni a, HFW depart­ment chuan sanction order an hmuh veleh a hman dan tur an ruahman a ni. 

Cheng nuai 300 chu Covid-19 donaa hman turin procurement atana hma latu tura Mizoram sorkarin a ruat Task Group on Medicine and Medical Equipment-in rua­hmanna an siam a, thing­tlang kilkhawr ber thlenga thawktute hman tur thil pawimawh hrang hrang lei tura rawtte pawm ni tawhin, supply order pawh chhuah a ni tawh.

Covid-19 vanga damlote leh sample-te phurtu tur ambulance pathum lei tura hmalak a ni a, GAD-in phalna a pe tawh. District hrang hranga Covid-19 vanga damlo leh rinhlelhte enkawlna tura rua­hman Covid Care Centre (CCC) leh Covid Dedicated Health Centre (CDHC) din nan te, Covid Dedicated Hospital (CDH) tihchang­tlunna atante hman tum a ni.

Health department chuan, Mizoram chu NEC fund hmang ṭha zingah a tel thu tarlangin, “Fund hman tur hun chhung hi thla hnih, May thla tàwp thleng hun pek a ni nãin, April 28, 2020 khan NEC Secretary chuan lehkha chhuahin, Covid-19 fund a pek hmarchhak state pariat zingah Assam, Manipur, Mizoram leh Meghalaya-te chu Covid-19 do kawnga ti ṭha leh hma la chak bik (comparatively ahead) an nih thu a sawi nghe nghe,” an ti.