Uluk takin ramri vèn a ni - Kolasib DC
Kolasib DC Dr H Lalthlangliana chuan, an district chhung chu hmun 13-ah ṭhenin uluk takin ramrite vèn a nih thu Vanglaini palai zawhna chhángin a sawi.
Dr H Lalthlangliana chuan, sorkar department hrang hrang aṭangin zonal magistrate 13 ruat a nih thu sawiin, "Anni hian bial ṭheuh neiin, an bial chhunga ramri venhim a nih dan te, mamawh awm te, task force-te mamawh leh harsatna neihte leh force dah belh aṭul dante an vil ṭhin. An report aṭangin a ṭul angin hmalak chhunzawm a ni," a ti.
Kolasib khawpui chhunga tlawmngaia ramria duty thei inpe (volunteer) tur an zawn thu sawiin Kolasib DC chuan, "Kum 18-40 inkar mi 456 an inpe thei a ni. Khaw lian deuhahte anni ho hi duty a ngai kher lo mai thei a, khaw tê deuhte chu puih an ngai mai thei," a ti a; volunteer-te chu engtik hunah pawh duty tura an inpeih reng thu a sawi.