Rev. VL Hruaia'n lawmthu a sawi

Mizorama Covid-19 hripui vei awmchhun Rev. VL Hruaia Khiangte chuan May 9, Inrinnia dam taka State Referral Hospital a chhuahsan hnuah lawmthu a sawi a; Pathian, amah enkawltute leh Mizoram mipui chungah lawmthu a sawi.

Rev. VL Hruaia chuan, Covid-19 vangin hun rei tak Zoram Medical College (ZMC)-ah damloin hun a hmang tih sawiin, lawmthu sawina tur tam tak a neih thu a sawi a, "Min tidamtu Pathian hnenah lawmthu ka sawi a, Pathian hnathawh a lan theihna tura nasa taka ṭawng­ṭai ṭhinte - Zoram mipui, kohhran bik awm lo, kum bithliah bik awm lo, naupang tê tê aṭanga kum upa zawk thlenga tih tak zeta min ṭawng-ṭaipuitute hnenah lawmthu ka sawi a ni," a ti.

Falkawn damdawi-inah doctor leh nurse thawktu ṭha tak takte’n an enkawl tih sawiin VL Hruaia chuan, “Anni hi ka chhuang a, an inpekna te, an dawhtheihna te, min duhsaknate ka ngaih­tuahin ka lawm em em a ni,” a ti a; Mizoram sorkara Health department official-te leh minister thlengin a damloh chhunga an ngaihtuahnaah a lawm thu a sawi.

Rev. VL Hruaia Khiangte chuan, duhsak taka thilpek petute hnenah a lawmthu a sawi a, “Ṭhenkhat chuan sum leh paitein min ṭanpui a, ṭhenkhat chuan ei tur ṭhate min pe a. Sawi sen an ni lo a, an vaia chungah lawmthu ka sawi tak meuh meuh a ni,” a ti.