Tangkhang mi 8,000 chuang an haw duh TN sorkarin Mizote haw man a tumsak

Inkhàrkhip vanga state páwna Mizo tangkhangte buaipui tura din Task Group on Migrant Workers & Stranded Travellers hnena Mizoram leh hmarchhak state páwn lama tangkhang Mizorama haw duh inhriattir zat chu mi 8,000 chuang an tling tawh; rawn haw mek eng emaw zat an awm.

Task Group on Migrant Workers & Stranded Travellers hotute hnen aṭanga Vanglaini thu dawn danin, haw duh inhriattir an awm belh zel a, nimin khan 8,000 an chuang tawh. Tangkhang haw duhte chuan an awmna state-a Mizo welfare/association hruaitute an hriattir a, hruaitute'n Mizoram sorkar hnuaia Group-ah hian an hriattir chhawng ve leh a ni.

Hetih lai hian, state ṭhenkhat aṭangin motor hmangin an rawn haw mek a, rawn haw thleng tawhte pawh an awm.

Nimin zing dar 6 vel khan Jharkhand-a awm Mizote chu Mizoram panin bus pahnih hmangin Ranchi aṭangin an rawn chhuak. Jharkhand-a tangkhangte hruai haw an nih theih nan hian Jharkhand Chief Minister leh Mizo IAS officer Biaktluanga ten hma an la nia thu dawn a ni. Jamshedpur aṭang pawhin bus hmangin an rawn haw mek nia thu dawn a ni bawk.

Chennai-a Mizo tangkhangte chu Tamil Nadu sorkar rua­hmannain zanin hian rél hmang­in Mizoram an rawn pan dawn. Chennai Mizo Welfare Asso­ciation (CMWA) hotute hnen aṭanga thu dawn danin, Chennai-a tangkhangte chu anmahni sensoa haw turin Mizoram sorkarin a tih avangin CMWA hruaitute'n Tamil Nadu sorkar hnenah an hawna tur ngaihtuahsak turin an ngen a ni. 

Tamil Nadu sorkar chuan rél a ruahmansak a, ṭum khatah tangkhang zawng zawng erawh an leng dawn lo. Nimin khan haw duhte chu medical team-in an endik a, zanin hian an rawn chhuah hman beisei a ni.

Railways thuneitute chu Bairabi thleng tlàntir turin CMWA chuan a ngen a, he thu ziah lai hian Railways lam thutlukna hriat a la ni lo.

State páwna Mizo tangkhang, rél hmanga haw duhte chu an chuan man aṭanga 85% chu sorkar laipui tum tur a ni a, 15% chu an awmna state tum tur a ni thung.

Hetih lai hian, hmar­chhak state páwn lama Mizo tangkhangte an rawn haw ṭan avangin Covid-19 designated hospital - State Referral Hospital (SRH)-ah damlo dah ngai an pung thei tih hriain damdawi-in thuneitute chu an inbuatsaih mek. Nimin khan SRH-ZMC hotute chuan damlote enfiahna (screening) hmun leh damlo dahna tur ward-te an endik a ni.

SRH-ZMC Bulletin tarlan danin, State Referral Hospital-ah hian tun dinhmunah damlo, insawisel dan azira admit-na tur ward hrang hrang pakua siam a ni a, chu’ngah chuan khum 139 a awm a ni.