Bangla aṭangin ráltlân 300 vel rawn lut ; Ráltlânte tan ṭang turin CYMA-in a ngen

India leh Bangladesh inrìna bul hnai, Bangladesh ram chhunga cheng Mizo hnahthlakte'n Bangladesh sipai leh Arakan Army-te ṭang dun chêtna avangin harsatna lian tak an tawk mek a; sahimna zawngin mi 300 vel Mizoramah an rawn lut tawh. Sahimna zawnga Mizorama tlânchhiate chhawmdawl an nih theih nan ṭan la turin Central YMA chuan YMA sub-headquarters, group leh branch-te a ngen.

Lawngtlai aṭanga thu dawn danin, Bangladesh sipai leh Arakan Army-te ṭangrual chuan Bangladesh-a Mizo hnahthlak péng hrang hrangte'n an hamṭhatna atana hma la tura an din Kuki Chin National Army (KNA) an bei a ni. KNA-a tel lo, nunaute tan pawh a him loh avangin sahimna zawngin mi 300 vel chu Mizoramah an rawn lut tawh a, ramri bula khua Parva-ah an lut deuh ber a ni.

Central YMA chuan thuchhuah siamin, Bangladesh-a chêng Mizo hnahthlakte'n tunlai hian harsatna lian tak an tâwk mek tih sawiin, "Dik lo taka hêk an nih avangin tunah hian Mizoram lamah ráltlân eng emaw zat an lo lut tawh a, sipai hlaua tlânchhia, ramhnuaia tangkhang an awm mek bawk," an ti.

Bangladesh aṭanga ráltlân rawn lutte chungchang hi CYMA hruaitute chuan chief minister Zoramthanga an sawipui a, thlamuang taka an awm theihna tura hma la turin an ngen a ni.

Sahimna zawnga Mizorama tlânchhiate chhawmdawl turin CYMA chuan theihtawpa hmalak an tum a, chhawmdawlna hmasa atan Rs 50,000 pek an remti. Harsatnain a awh rei zawng tur hriat a nih loh avangin, Zo hnahthlak ráltlante chhawmdawl an nih theih nan YMA sub-headquarters, group leh branch-te ṭan la turin an ngen a ni. CYMA chuan, "Mizo mipuite pawh he harsatnain a tuam mek kan unaute tana ke pên turin kan insawm e," tiin an tarlang.

Nimina Council of Minister ṭhukhawm chuan Bangladesh-a Mizo hnahthlakte'n harsatna an tawh chungchang leh sahimna zawnga Mizorama rawn râltlân, Parva khuaa awm mekte chungchang an sawiho a; an lainat thu tarlangin, "A theih ang anga lo tuamhlâwm zui zel ni se," an ti.

Ráltlânte chungchang hi CM Zoramthanga pawhin Instagram-ah a tarlang a, "Parva lama kan Bâwm unau za tél harsatna tâwk mekte dinhmun chingfel turin theihtawp Mizoram sorkar chuan a chhuah zel dawn. Mizoram sorkar hruaitute leh CYMA hruaitute nen emergency meeting neiin, an harsatna tawhte sukiang turin theihtawp kan chhuah mek e," tiin a tarlang.