Union MoS Ashwini Kumar Choubey-a'n hna hmu tharte appointment letter a hlân

Nimin khan Assam Rifles Loch Hall, Aizawlah Rozgar Mela pualin India rama hna hmu tharte hnena appoinment letter hlanna inkhawm buatsaih a ni a, Union minister of state Ashwini Kumar Choubey-a'n hmanpuiin, hna hmu tharte hnenah appoinment letter a hlân.

Rozgar Mela pual hian India rama ṭhalai hna hmu thar mi 71,000-te appoin­ment letter pek inkhawm hmun hrang hrangah buatsaih a ni a, prime minister Narendra Modi-a thusawi video conferencing kaltlangin ngaihthlak a ni. Aizawla Assam Rifles hmuna hman­naah hian Union Minister-in mi 79 hnenah appointment letter a hlân a ni.

Appoinment letter hi Mizoramah chuan Assam Rifles-a hna hmu thar mi 62, Border Security Force-a hna hmu thar mi 12, Services Selection Board (SSB)-a hna hmu thar mi pali leh Indian Overseas Bank-a hna hmu thar mi pakhat hnenah hlan a ni.

Ashwini Kumar Chou­bey chuan, PM Narendra Modi kaihhruaina hnuaiah Rojzar Mela hlawhtling taka a kal zel thei chu ropui a tih thu sawiin, "Mizoram ṭhalai 79 zet hnena appointment letter ka pe chhuak thei hi ka lawm hle. Ṭhalaite hi ram nghahfâk an ni a, ṭhalaite an chak chuan ram a chak a ni," a ti.

Prime Minister kaihhruaina hnuaiah hmeichhiate tan hamṭhatna tam tak a awm thu sawiin Union Minister chuan, "Vawiina appointment dawng tam tak zinga mi pawh hmeichhia an ni a, kawng engkimah kan ram dah hmasak a pawimawh," a ti a; hna hmu tharte chu kawng engkimah malsawmna dawng tlaka thawk turin a fuih.

Inkhawmah hian MLA Dr Buddha Dhan Chakma, Assam Rifles 23 Sector DIG Digvijay Singh leh Assam Rifles leh BSF hotu eng emaw zat an tel a ni.

Union MoS hian Thawhṭanni zan khan Raj Bhavan-ah Governor Hari Babu Kambhampati a kâwm a; Mizoram dinhmun tlangpui, Mizorama hmasawnna ruhrel lian zual thawh mekte leh sorkar hmalakna pawimawh dangte pawh an sawi dun.

Governor chuan, National Institute of Technology sakna tur hmun ala fel theih loh thu sawiin, forest clearance chingfel thuai turin a lo ngen a ni.