Mizoram electoral roll aṭangin Bru mi 2,006 paih an ni tawh
Tripura refugee camp-a awm ṭhin, Mizoram electoral roll-a chuangte chu Election Commission of India (ECI) thu angin Mizoram electoral roll aṭangin paih mek zel a ni a, November 17, 2022 thleng khan mi 2,006 paih an ni tawh.
Tripura refugee camp-a awm ṭhin Bru eng emaw zat chuan Mizoramah vote an nei a, constituency pakua - Mamit, Hachhek, Dampa, Tuirial, Kolasib, Serlui, Lunglei South, West Tuipui leh Thoráng biala vote nei mi 2,006 chu Mizoram electoral roll aṭanga paih an ni tawh a ni.
Mizoram electoral roll aṭanga paih zingah Hachhek biala vote nei an tam ber a, mi 1,125 an ni a; Hachhek dawta Bru, vote nei tamna bial chu Mamit a ni a, mi 396 paih a ni tawh.
Mizoram Election department hotute hnen aṭanga Vanglaini thu dawn danin, Mizoram electoral roll aṭanga Bru-te paih hna chu electoral roll ennawnna kalpui a nih avangin hun eng emaw chen chawlhsan lailâwk a ni a, draft roll tlangzarh a nih hnuah chhunzawm a ni ang.