MPF member zinga party àwn lam neite MPF aṭanga inthiarfihlim ngam turin ngen

Mizoram People Forum (MPF) chuan nimin khan Vanapa Hall-ah Annual General Meeting vawi 15-na an hmang. Thuchah sawitu MPF vice president R Lalngheta, Central YMA president ni bawk chuan, MPF member zinga party àwn lam neite chu MPF aṭanga inthiarfihlim ngam turin a ngen.

MPF inkhawmpui chawhma inkhawm chu MPF president Rev. Dr Vanlalnghaka Ralte-in a kaihruai a; MPF vice president R Lalngheta'n thupui, 'Kum 2023 General Election atana hmalak dan tur' tih a sawi.

R Lalngheta chuan, MPF chu ṭan lam nei loa kal tur a nih thu sawiin, "MPF member-te hi political party-ah inziak lut lo mah ila color a neih theih tlat. MPF-a inhmang tak, tu party-in emaw an ta anga an ngaih theih an awm ṭhin a, kan local forum aṭang hian YMA kaltlangin report kan dawng fo," a ti a, neutral thei lote chu MPF aṭanga inthiarfihlim ngam turin a ngen a ni.

MPF member-te chu ṭangrual tur leh huaisen tura sáwmin R Lalngheta chuan, "Kum 2023 inthlan lo awm turah hian huaisen thar ang u. Local forum huaisen an awm laiin strict vak lo an awm ṭhin tih inthlan lo awm tawh aṭangin kan hria a, MPF duh loh dana kalte lakah huaisen takin che ngam tawh ang u," a ti.

MPF chu a chak lehzual theih nan kohhran leh páwl hrang hrang bakah, ṭhalaite tel theihna tura hmalak a ṭul thu a sawi a; Mizoram tan theihtawp chhuaha politician-te khalh ngil tura ṭan lak a ṭul thu a sawi bawk.

Chawhnu inkhawm chu MPF vice president Rev. Zionvarmawia Fanchun-in a kaihruai a, Rev. MS Dawngliana'n 'Party ruihchilhnain ram leh mipui a nghawng dan' tih thupui a sawi.

MPF Annual General Meeting-ah hian hmalakna, sum dinhmun leh MPF dan bu ennawnnate pharh a ni a, sawiho a nih hnuah siam rem ngai laite chu Governing Board kutah an dah.

MPF hian kum 2021-22 chhungin Rs 17,38,588 an hmu a, Rs 9,52,684 an hmang. Kum 2023-24 budget atan Rs 16,48,000 an pawm a ni.