Mipuiin curfew an zâwm ṭha thawkhat Zinga insawizawite'n dan zâwm ṭha lo
Mizorama inkhàrkhip thawh thumnaa zan lama khawlaia chhuah phal lohna (curfew) thupek chu mipuiin an zâwm ṭha thawkhat a, mahse, zing kara curfew zawh hnua insâwizawi ṭhin zingah dan zâwm ṭha lo an tama sawi a ni.
Covid-19 vanga inkharkhip thawh thumna chu chawlhkar khat hman a ni tawh a, chumi chhung chuan chhun lamah zalên takin mipui an chhuak thei a, zan dar 7 aṭanga a tûk zing dar 4 inkar erawh chu curfew puan a nih avangin rîkrum thil leh phalna nei lo tan khawlaia chhuah phal a ni lo.
Aizawl hmun hrang hranga tlai dar 6 aṭanga zing dar 9 inkara police duty-te Vanglaini palaiin a kawmnaa an sawi danin, chhûn lamah chhuah theih a nih vangin Aizawl véng tam zawkah chuan mipuiin zan lamah curfew an zâwm ṭha thawkhat a, curfew laia lirthei tlânte chu emergency thila chhuak leh office báng tlai leh phalna neite emaw an ni tlangpui.
Chutih laiin, Aizawl chhuah lamah erawh chuan zan lama curfew laiin ruih theih thil ti ṭhinte hmuh tur an awm nual thu duty-te chuan an sawi a, "A tlangpuiin kan hnawt haw ṭhin a, a luhlul zualte chu Bawngkawn Police Station-ah kan thawn phei ṭhin," an ti a; harsatna lian tham siam erawh an awm ngai loh thu Vanglaini palai an hrilh.
Police duty-te chuan, curfew-in a huam loh chin zing karah taksa insawizawia chhuak an tam thu Vanglaini palai an hrilh a, "Social distancing an nei thei meuh ṭhin lo; kan han hau a, mahse, an tam ṭhin avangin hauh sèn an ni lo," an ti. Hmai tuam loa chhuak an awm fo thu sawiin, "Challan kan kawla pawisa chawitir pawh kan nei nual, a ṭhen chu kan hawtir a, a ṭhen chu dawr inhawnga mi kan leitir ṭhin," an ti.
Duty pakhat chuan, pawisa inchawitir vek a buaithlak ṭhin thu sawiin, "A ṭhen chuan hmui leh hnâr khuh si loin hmai tuamna an vuah a, kan hau ṭhin. Mahse, taksa insawizawi an nih miau avangin hmui tuam a harsa pawh a ni mai thei. Pawisa chawitir vek dawn chuan buaithlakna chin a awm fo," a ti a; social distancing chungchanga dan kenkawh pawh a buaithlak thu a sawi bawk.