Lawngtlaiah LADC golden jubilee lawm

Lai Autonomous District Council (LADC) chuan LADC kum 50-na nimin khan CYLA Playground, Lawngtlaiah an lawm a, Lawngtlai East bialtu MLA H Biakzaua'n a hmanpui.

Golden Jubilee lawmna hi April 29, 2022 khan hawn a ni a, kumin chhungin a lawmna chi hrang hrang kalpui tura ruahman niin, vawiinah chhunzawm a ni ang.

Jubilee lawmnaah hian Mara Autonomous District Council (MADC) deputy chief executive member HC Lalmalsawma Zasai chu khualzahawm a ni a; MADC aiawhin LADC chief executive member V Zirsanga hnenah jubilee lawmpuina a hlân.

LADC hi kum 1953-a din, Pawi-Lakher Regional Council (PLRC)-in a hrin a ni a; April 29, 1972 khan LADC tia din a ni. Tunah hian elected member 25 leh nominated member pali, an vaiin member of district council (MDC) 29 an awm.

LADC huam chhung zau zawng chu sq.km. 1,870.75 a ni a; village council 97 a awm a, chhungkua 21,358 awmin, mi 1,03,456 vel an awm a ni.