Mahni bial vil uluk turin PE minister Lalzirliana'n Power officer-te a chah

Power & Electricity Engineering Officers’ Association (PEOA) chuan nimin khan Aijal Club-ah Annual General Conference vawi 22-na an hmang a, Power & Electricity minister R Lalzirliana'n hmanpuiin, mahni bial hre chiang a, vil uluk leh zual turin PE department officer-te a chah.

R Lalzirliana chuan, thlasik a inṭan tawh avangin harsatna thleng theite hmachhawn dan tur inbuatsaih lâwk a ṭul thu a sawi a; mahni bial hre chiang a, vil uluk leh zual turin PE department officer-te a chah a ni.

Technology lama hmasawnnain kawng hrang hrangin awlsamna a thlen tih sawiin Lalzirliana chuan, "Khawl ṭha tak tak lo chhuakte hian kawlphetha tel lo chuan awmzia an nei lem lo. Ram changkang zawkte ruala ke kan pên theih nan kan mamawh ang kawlphetha kan siam chhuah emaw, kan lak luh emaw hi pawimawh hmasa a ni," a ti.

Kawlphetha siam chhuah kawngah India ramin nasa takin hma a la mek tih sawiin Minister chuan, "A bik takin renewable energy siam chhuah hi sorkar laipuiin thupuiah a nei mek a, kum 2070-ah chuan zero emission nei turin chak takin hma a la mek a ni," a ti a; chumi bawhzui chuan Mizoram sorkarin DPR leh a kaihhnawihte a buaipui mek tih a sawi.

Conference hi PEOA president Benjamin L Tlumtea'n a kaihruai a, member pali sûn niin, pensioner-te thlahna hun hman a ni a; minister R Lalzirliana'n Kawlphetha Journal leh Annual Report 2022 a tlangzarh. Chawhmaah rorel a ni a, post ruak hnawh khah chungchang te, kawlphethaa intodelh - hydel generation lamah tih leh electrical accident and safety measures chungchang sawiho a ni.