Kolasib district-ah October 2022 chhungin HIV+ve mi 7 hmuh a ni

Kolasib District AIDS Prevention & Control Committee leh YMA Sub-Headquarters, Kolasib chuan nimin khan DC conference hall-ah HIV laka invèng tura ṭhalaite zirtirna beihpui thlakna 'Zoram Hrah Rawh’ campaign an buatsaih a, MLA K Laldawngliana'n a hmanpui. October 2022 chhunga mi 580 endik zingah HIV vei mi pasarih hmuh a nih thu tarlan a ni.

Zoram Harh Rawh Campaign-ah hian HIV chungchang inhrilhfiah a ni a; hla inphuahsiakna lawmman sem niin, Lalzikpuii, Kolasib Ṭumpui chu pakhatna a ni. Chawhnuah hnam làm leh pipu zai hmangin YMA branch-te an intihsiak a, a thlawna HIV hrik endikna buatsaih a ni bawk.

Chief medical officer Dr Lalawmpuia Chhangte tarlan danin, kum 2002 aṭanga kumin October thla thleng khan Kolasib district-a thisen endik 85,096 zingah HIV vei mi 1,690 hmuh a ni. October 2022 bikah thisen 580 endik aṭangin HIV+ve mi pasarih hmuh chhuah a ni a, thisen endik zinga 1.98% chu HIV positive an ni.

MLA K Laldawngliana chuan, "HIV laka him turin nun uluk leh thianghlim, mahni inthunun theihna leh thuawihna a pawimawh a, HIV inkai chhàwn theihna hluar ber chu insûmtheihna hmanga do hneh theih a ni," a ti a; HIV vei mekte chu nunphung pangngai an zawh zel theihna tura beiseina siamsak a pawimawh thu a sawi. Kolasib DC John LT Sanga pawhin thu a sawi a ni.