Misual kutah ralthuam a luh a hlauhawm - Maj.Gen. Nambiar

Assam Rifles inspector general (East) Maj. Gen. VR Nambiar chuan, Mizo­ram chhunga misualte kutah ralthuam a luh a hlauhawm thu a sawi.

Maj. Gen. VR Nambiar hian nimin khan 2nd Assam Rifles hmuna AR Loch Hall-ah Mizorama páwl hrang hrang hruai­tute a kâwm a; Mizoram ramri kaltlangin ralthuam tawlh rûk a nih ṭhin thu sawiin, "Hmun danga a kal chu thu hran, ral­thuamte hi Mizoram chhunga misualte kutah a luh a hlauhawm tak zet a, a luh chuan a pawi dawn hle a ni," a ti.

Mizoram kaltlanga ralthuam vèn a pawimawh avang leh misualte kuta a luh lohna atan thawhhopuiah Mizorama páwl hrang hrangte chu VR Nambiar chuan a sáwm a ni.

Maj. Gen. VR Nambiar chuan, ruihhlo donaah Assam Rifles-in theihtawp an chhuah thu leh theihtawp an chhuah zel dawn thu a sawi a; Central YMA-te'n thawhhopuia an sawmna chu an pawm reng thu a sawi bawk.

Inkawmhonaah hian Central YMA, MUP, MHIP, MFA, MZP leh MSU aiawhte an tel a, Assam Rifles nena thawhho theihna an neihte leh Assam Rifles-in hma la se an duhna hrang hrangte an sawi a ni.