Bru leh Chakma-te kan en hrang lo - Lalduhoma

ZPM leader Lalduh­oma chuan, Mizorama hnam tênau Bru leh Chakma-te chu an en hran loh thu a sawi a; ZPM-in sem policy an nei lo a, pawisa an sem dawn loh thu a sawi bawk.

Lalduhoma hian nimin khan West Phailenga Tawna Hall-a ZPM Dampa West Block Conference-ah thu sawiin, "Kan minority Bru leh Chakma unaute hi kan en hrang miah lo a, anmahni puala central aṭanga sum lo kalte'n an hnen a thleng mumal lo tih kan hria a, ZPM chuan an hnen thlentir ngei kan tum a ni," a ti.

Sum neih loh vanga harsatnate sukiang tur leh ṭanpui tlakte ṭanpui turin 'Bána kaih policy' hmangin bul ṭanna an ngaihtuahpui dawn tih sawiin Duhoma chuan, "Kum nga chhung hian mi tumruh leh taimate chu an dingchhuak thei em em ang. ZPM hian sem policy a nei lo a, kan sem dawn lo," a ti a; sem policy zuar an la awm leh fo chuan mipui hmasawnna duhtute an ni lo tih hre turin mipui a chah.

ZPM leader Lalduhoma chuan, kohhran leh tlawmngai pawlte'n eirûkna do an rél mek tih sawiin, "Eirûkna dopui tur kan ngah ta. ZPM a sorkar chuan Lokayukta kan tichak dawn a, CBI koh luh a ni ang. Lui hnár tifim turin CM-in work department a chang dawn lo. VUC-in party leh sorkar a uap ang a, CM leh party president nihna chelh kawp a rem dawn lo a, minister-te pawh party elected OB an ni dawn lo," a ti.

Lalduhoma chuan, ZPM an sorkara an kalphung tur sawiin, "MLA-te hamṭhatna a zatvein kan titlem nghal dawn a, sorkar sumin car kan leisak dawn lo a, VIP culture tihbo a ni ang," a ti. ZPM chu ram leilung hausakna aṭanga intodelh tum party a nih thu te, loneitute tan budget-ah sum an dah dawn thu te, thlai thar mumal taka hralh turin vegetable supply chain an siam dawn thute a sawi bawk.

Thusawitu dang K Sapdanga, ZPM working president chuan, "Mizoram hian eirûkna kan duh lo tak zet tih entir nan MNF hi kan dah 'nil' a ngai. Kan khingpui party ṭhenkhat hian mipui hi lamṭanga sàwm an tum lêm lo, last minute-ah eng emaw hûm chunga chibai sem a tâwkin an hria a, ZPM chuan chibai bawlhhlawh hi mipui hmuhsitna tàwpkhâwkah kan ngai a, tih ve kan tum lo," a ti.

K Sapdanga chuan, thingtlangah ZPM thli a tleh mek nia sawiin, "Bru leh Chakma unaute an harh mek. Dâwt leh thutak an thliar thiam tawh a, inbumtir an tum tawh lo," a ti a; sorkar kalphung thar din turin mi thar, rilru thianghlim la pú an hmu mek tih sawiin, "Budget pharh fo tawh nih hi chhuan tlak a ni lo a, budget la pharh lo hi hmuhsit chi a ni lo," a ti bawk.

ZPM Dampa West Block Conference-ah hian ZPM zawm thar mi 306 lawm luh an nih thu ZPM thuchhuah chuan a tarlang.