Ramin sum harsatna a tawh mek laiin Finance changtu CM a ngawi - MPCC

Mizoram Pradesh Congress Committee (MPCC) Media depart­ment hruaitute chuan nimin khan Aizawl Press Club-ah thuthar thehdarhtute an kâwm a; Mizoramin sum harsatna a tawh mek laiin Finance changtu chief minister Zoramthanga a ngawi tlat niin an sawi.

MPCC Media chair­man Dr Lallianchhunga chuan, Mizoramin sum leh paiah harsatna naménlo a tâwk mek tih sawiin, "Sorkar hnathawkte'n tun hma angin thla tìrah hlawh an la ngai tawh lo a, pension-a chhuakte'n an pension pawisa dawng turin thla tam an nghah ziah a ngai tawh," a ti.

Dr Lallianchhunga chuan, sorkarin health care scheme a kalpui mumal theih loh avangin cheng vaibelchhe tam tak bill an ba mek tih sawiin, "Mipuite'n health care scheme-ah rinna an nghat ngam tawh lo a, chhungkaw inziak lut pawh nasa takin a tlahniam," a ti a; tun ang reng renga dinhmun chhiaah Mizoram a la din ngai loh thu a sawi.

Ramin sum harsatna a tawh mek laiin CM a ngawi tlat nia sawiin Lallianchhunga chuan, "Pûk belh zel loh chu sum leh pai dinhmun siamṭhat tuma a hmalakna thâwm hriat tur a awm lo. Kan dinhmun chhiatzia sawi chhuaktu apiang chu MNF hruaitute'n ṭawngkam buluk tak takin an bei let dur dur reng zawk a ni," a ti.

MPCC Media chairman Dr Lallianchhunga sawi danin, Finance Minister pawh ni lo, MNF MLA leh an party hotu ṭhenkhatte'n Mizoramin sum leh pai harsatna a tawh mek sawi mâm tumin thapui an thawh mek a ni.

MNF MLA L Thang-mawia’n, 'MPCC-in Mizoram leiba cheng vbc. 12,553.08-ah a pung chho anga an tarlan hi khawi aṭanga data an neih nge? Tui lêt hnuah Mizoram leiba hi cheng vbc. 12,553.08 a la tling ngai lo hrim hrim' a ti chu thil zahthlak takah an ngai.

July 25, 2022-a Finance department-in RTI Act hmanga zawhna an chhannaah chiang taka ziah lan a ni a; Mizoram budget bu, Annual Financial Statement 2022-23 phek 24-naah en theihin a awm bawk.

CM Zoramthanga chu Mizoram sum leh pai enkawl thiam a ni tih finfiahna budget document-ah hmuh tur a awm lo nia sawiin MPCC Media hruaitute chuan, "Congress sorkar erawh Mizoram sum leh pai dinhmun siamṭhatu a ni tih finfiahna budget document-ah a awm," an ti a; MNF sorkar chu sum harsatna sawi pial tuma hma la tawh lo turin an chah.

MPCC Media chuan, Congress party chu Pathian zarah a chhe lai siamṭhatu a lo ni tawh ṭhin nia sawiin, "A chhe lai siamṭhatu ni leh turin kan inbuatsaih mek. Mipui tana nu leh pa nih tling tak, sorkar ṭha sorkar din kan tum a, min thláwp turin mipuite kan sáwm che u a ni," an ti.