CM-in a bialah tuizem leh kháwl a sem

Chief minister Zoramthanga chuan nimin zing khan a bial, Aizawl East-I chhunga Muthi, Muanna Veng leh Zuangtuiahte Covid-19 vanga harsatna tâwk leh hmeithaite hnenah puanṭhui kháwl 26 leh tui litre 1,000 dawng tuizem 13 a sem.

Zoramthanga chuan, hripui léng vangin Mizoram, India ram leh khawvel pumin harsatna an tawh thu sawiin, "Kum hnih dáwn chu state budget-a sum dah tawh, hri léng vanga kan dawn leh tâk loh avangin harsatna nasa tak kan tâwk a, chuti chunga vawiin kan thleng thei hi kan vannei hle," a ti a; hmasawnna hna theihtawp chhuaha thawh a nih zel tur thu a sawi.

Chief Minister chuan, hripui léng leh harsatna dang, ṭum danga thleng zen zen lo avanga Mizoram hmasawnnain a tawrh phah chu pawi a tih thu a sawi a; MLA fund aṭanga thil sem dawngtute'n ṭangkai taka an hman a duhsak thu a sawi bawk.

Puanṭhui kháwl leh tuizem hi MLA fund hmanga lei niin, a lei nan Rs 8,00,000 dah a ni a, Aizawl East-I bial chhunga veng dangah pawh sem zel tura ruahman a ni.