Mipui thlavâng hauh turin theihtawp kan chhuah zel dawn - MPYCC President

Mizoram Pradesh Youth Congress Committee (MPYCC) hruaitute chu nimin khan Congress Bhavan-ah an ṭhukhawm a; an president Dr Lalmalsawma Nghaka chuan, mipui manganna a awm apiangin Congress ṭhalaite'n ke an pên zel dawn thu a sawi.

Dr Lalmalsawma Nghaka chuan, healthcare bill táng vanga mipui mangangte auráwl chu ngaihthlak reng hrehawm an tih thu sawiin, "An thlavâng hauh nana High Court-a PIL thehluh tawh pawh High Court-in thu tlingah ngaia a lo pawm ta hi ṭha kan ti hle. Mipui harsatna hrang hrangah an thlavâng hauh turin theihtawp kan chhuah zel dawn a ni," a ti.

Congress party-in manifesto no. 1 an tlangzarh aṭangin ram siam tumna tak tak an nei tih a chiang nia sawiin Dr Lalmalsawma chuan, "Mipui vote duh vanga tih theih miah loh leh tih tum miah loh intiamkamna a tel ve lo a, sorkar ṭha siam tumin Mizoram mipui leh theihtawpa ṭang mekte, mahni kea an din theihna tur manifesto a ni," a ti a; Congress ṭhalai chuan mi harsa leh damlo mangang ṭanpui ngaite ṭanpui an ngaih pawimawh tur thu a sawi bawk.