Quarantine centre atan kohhran hall dil tum

Health & Family Welfare minister Dr R Lalthangliana hoin nimin khan SAD conference hall-ah state danga tangkhang mek Mizorama haw turte khung hranna tur kaihhruaina dan thlir­ho a ni. Kohhran hall-te qua­rantine facility atana hman theih dan ngaihtuah turin kohhran hruaitute dawr an rél.

Dr R Lalthangliana chuan, Covid-19 donaah Mizoramin hma a la ṭha hlea a hriat thu sawiin, "Kohhran, tlawmngai pawl leh mipuite aṭangin thawhhona ṭha tak hmuh a ni a, kil tin aṭangin theihtawp chhuah mek a ni. Chanchinbu, TV leh AIR-te'n sorkar hmalakna puanzarnaah theihtawp an chhuah a, a lawm­awm tak zet," a ti.

Chief secretary Lalnunmawia Chuaungo chuan, Mizorama haw tur inziak lut chu May 10, Pa­thianni zan thlengin mi 8,415 an tling tawh tih sawiin, "Sorkarin quarantine facility a neih zawng zawngah an leng vek dawn lo a, hmun khata dah khawm hi risk a san avangin mahni in lama in­khung hrang theite chu task force-te hriatpuinain home quarantine phalsak an ni," a ti. Quarantine-na tura sorkarin hotel a thlanah pawh an duh chuan man chawia awm theih dan sorkarin a ruahman mek thu a sawi.

Indian Medical Association (IMA) Mizoram Chapter president Dr Rosangluaia chuan, Covid-19 vanga harsatna chu nunpui thiam a ngai dawn tih sawiin, "A theih chin chinah kan him theih nan nunphung pangngai kan thlak a ṭul dawn a, kan inzirtir a ngai hle dawn a ni," a ti.

#    Mipui inzirtirna atan police-in kawtthlêr fangin mobile announcement kalpui se.

#    Zarkawt, Dawrpui leh mipui tamna hmun dangahte patrolling leh awareness a tam thei ang ber neih ni se.

#    Kohhran hall-te quarantine facility atana hman theih dan ngaihtuah turin kohhran hruaitute dawr ni se.

#    Home quarantine-a awm turte'n danin a phût zawng zawng an tlin em tih leh anmahni vil dan turte rèl a ni.