KHAWTHLIR

Kolasib che tha
Ministry of Jal Shakti hnuaia Department of Drinking Water & Sanitation chuan thingtlang khua in tina tui connection pekna scheme, Jal Jeevan Mission a kalpuiah Kolasib district chu kumin October thlaa ti ṭha ber, Best Performing District zinga Four Star category-ah pakhatna a ni. Kumin October thla chhungin Kolasib district-a khaw 48-ah in 9,038 zinga 8,767-ah tui connection pek a ni a, 97% a tling. Har Ghar Jal khua 15 a awm tawh bawk.

RTI Act zirho
State Information Commission leh Administrative Training Institute (ATI) chuan November 21, Thawhṭanni aṭang khan ATI Auditorium-ah 'Workshop on RTI Act 2005 for SPIOs/SAPIOs' an buatsaih ṭan a, nimin khan chhunzawm a nih bakah, vawiiah pawh chhunzawma zawh a ni ang. Workshop-ah hian RTI Act chungchang an inhrilhfiah bakah, RTI Act kaltlanga sâwt zawka mipui rawngbawl dan turte an sawiho a ni.

YMA jubilee lawm
YMA, Sertlangpui Branch chuan nimin khan an khaw community hall-ah an branch kum 50 tlin an lawm a, bialtu MLA C Lalrinsanga, minister-in a hmanpui. Inkhawm hi Sertlangpui YMA president K Vanengmawia'n a kaihruai a; C Lalrinsanga chuan, YMA thiltumte tihlawhtlingtu ni ṭheuh turin a sáwm. Minister hian golden jubilee lungphun a hawng a ni.

Dy Speaker-in hawng
Assembly deputy speaker Lalrinawma chuan nimin khan a bial chhunga Khumtung khelmual thar a hawng a; Ramlai Zone Football Championship bakah, MLA fund hmanga sak Darlawng MHIP Rûn a hawng bawk. Lalrinawma chuan, infiammite chu tualchhung inelna ringawtah duh tâwk lo a, state páwnah inelna sang zawka tel thei khawpa rilru leh taksa lama inbuatsaih turin a fuih.

Hringnun hi
Mahmuaka Chhakchhuak lehkhabu ziah, 'Hringnun hi' tih chu nimin khan Aizawl Press Club-ah MLA Lalrindika Ralte-in a tlangzarh. Lehkhabu hi Rs 150 man a ni.