Sainik School-in Annual Day an hmang

Sainik School, Chhingchhip chuan November 25, Inrinni khan Annual Day hmasa ber an hmang a, Governor Lt.Gen. Nirbhay Sharma-a'n a hmanpui.

Governor chuan, Chhingchhipa Sainik School dinna tura ram petu chhungkaw 60 chu chhuanawm a tih thu sawiin, "Mizo khawtlang nun ṭhatzia tilangtu an ni," a ti a; India rama sikul ṭha Sainik School awm tawh zinga Chhingchhinga Sainik School a 26-na a ni chu lawmawm a tih thu a sawi.

Larsap chuan, Sainik School principal leh thawktu dangte chu fakin, zirlai naupangte nen bul ṭantu an nih angin, hun pawimawh tak an tawng mek tih a hrilh a, mi dangte entawn tura nun dan ṭha leh hriselna vawng tlat turin a chah a; sorkar laipuiin hmei­chhe naupangte Sainik School-ah luh a phal dawn thu a sawi.

Lt. Gen. Nirbhay Sharma chuan, Mizo sipai officer-te chu khawtlang tana mi ṭangkai an nih ṭhin thu a sawi rualin, Mizo zingah sipai officer an tlem tial tial thu a sawi a; Sainik School Annual Day lawmnaa kalkhawmte chu ruihhlo leh zûk leh hmuam do tura chahin, "Kan rilru leh khawhawi tihzau a ngai a ni," a ti.

Governor hian zirlai naupangte hnenah in­fiamna hmanrua a pe a, sikula thawk mi paruk hnenah proficiency cer­tificate a hlan bawk.

Principal Lt. Col. Inder­jit Singh-a'n Sainik School chanchin tlangpui a sawi a; tunah hian zirlai naupang 60 awm mekin, officer pahnih leh thawktu 21-in an enkawl a, sikul aiawhin inelna hrang hranga an feh chhuah ṭhin thu leh India ram hmun ṭhenkhatte an fankual pui tawh thu a sawi.

Sainik School Annual Day-ah hian zirlaite'n hnam làm leh an thiam thil te an entir a ni.