Damdawi-in 2 empanelment la tinung leh lo

Mizoram sorkarin Aizawla mimal damdawi-in pahnih, damloha inen­kawlna senso sorkara an dil let theihna, medical re­imbursement bill theihna a tihtawpsak chu a la tihnunsak leh lo a; tinung tura buaipui mek a ni.

Aizawl Hospital and Research Centre (AHRC), Khatla leh Care Hospital, Dawrpui te chu Rashtriya Swasthya Bimal Yojana (RSBY) zawm duh lo a, RSBY-a inziak lut damlote an dawnsawn duh loh avangin Mizoram sorkar chuan August 10, 2017 khan empanelment a titawp a ni.

Health secretary Lal­rinliana Fanai chuan Vanglaini palai zawhna chhangin, private hospi­tal pahnihte hian Mizo­ram sorkar aṭanga em­panelment an hmuh leh theih nan hma an la mek tih a sawi a, "Anmahni damdawi-in thuneitute chuan RSBY bill theih turin an inpeih tawh niin an sawi a, mahse, RSBY bill theih tur hian tihfel a la nih loh avangin empanelment hlihsak hi tihnun a la ni lo," a ti.

August 10, 2017-a Health secretary Lalrin­liana Fanai-in Notifi­cation a chhuaha a lan danin, Aizawl Hospital & Research Centre leh Care Hospital-te hi RSBY-a inziak lutte (BPL chhungkuate an ni) chu MR bill theih a hniam avangin an dawngsawng duh lo a; Mizoram sorkar leh Mizoram State Health Case Society (MSHCS)-in RSBY bill theih tura kalpui a, RSBY bill theite dawngsawnga admit ṭhin tura an ngen ṭhin chu an chháng lo a ni.

Hei vang hian Chief Minister hoa July 11, 2017-a MSHCS Governing Body meeting vawi 15-naah AHCH leh Care Hospital chungchanga thil tih dan tur ngaihtuah a ni a; damdawi-in pa­hnihte Mizoram sorkara empanel an nihna (empanelment) tihtawp an rél a ni.

Mizoram sorkara empanelled/recognised hospital ni tur hian RSBY leh Mizoram Health Care Scheme an pawma an kalpui a ngai nia thu dawn a ni.

AHRC leh Care Hospital-te Mizoram sorkara empanelment/recognition tihtawp a nih avang hian Mizoram sorkar hnathawkte leh Mizoram sorkar aṭanga MR bill thei tur reng rengin AHRC leh Care Hospital-a an awm/in­enkawl man sorkarah an la (bill) thei lo a ni.