Contractor leh department-te'n neitu rilru púa an thawh mipuiin an phût - CM Hawla

Lunglei High Powered Committee (HPC) sum hmanga Lungleia sorkar building an sak zinga an zawh tawh pathum chu, November 24, Zirtawpni khan chief minister Lal Thanhawla, Lunglei HPC chairman ni bawkin a hawng. CM chuan, contractor leh department-te'n neitu rilru púa hna an thawh zel hi mipuiin an phût tih a sawi.

Chief Minister chuan, Lunglei HPC-in sum an neih angte ṭangkai taka hmanga mipui leh sorkar tana rotling in an sa chu lawmawm a tih thu a sawi a, "Neitu rilru púa contractor leh department-te'n hna an thawh zel hi Mizoram mipuiin an phût a ni," a ti a; in thar an neihte chu sorkar hnathawkte'n phûrna thar an neih phah a, mipui tan ṭha leh zuala an thawh phah a beisei thu a sawi.

Lal Thanhawla chuan, Mizoramin kawng tam takah hma a sawn mek tih sawiin, "Hmasawnna tehfung pawimawh tak tak zingah Mizoram ṭhat fàlna tam tak hmuh tur a awm a, a lawmawm hle a ni," a ti.

NITI Aayog-in a chhui chiannaah, ei leh in ṭha khamkhawp hmuh loh vanga hrisel lohna (malnourishment)-ah Mizoram chu state dang zawng zawng aiin a ziaawm ber tih sawiin CM Hawla chuan, "Kum 2013 aṭanga 2016 chhungin state pali - Mizoram, Jharkhand, Tripura leh Gujarat-te chiah State Gross Demestic Product (SGDP)-ah an pung a ni," a ti a; State Per Capita Income-ah India ram pum average aiin Mizoram a sang zawk tih a sawi.

Chief Minister chuan, Mizoram chhim lam chu Asia chhimchhak lam ramte tlawhpawh nan India chhuahká a la ni dawn tih sawiin, "Lo inpuahchah lâwk bakah, rilru puthmangah siamṭhat ngai lai a awm chuan siamṭhat a, lo inhawnzau a ngai a ni," a ti a; chhim bial mipuite chu a hmun neitu an nih avangin an ṭhanharh hma lehzual a ngaih thu a sawi.

CM Lal Thanhawla chuan, lirthei liante'n Lunglei khawpui chhunga lut loa Lunglei an paltlang theihna turin Lunglei Bypass Road siam tum a nih thu sawiin, "Remchang hmasa berah NEDP sum hmanga bul ṭan a ni ang," a ti a; Mizoram chhim lama zirlaite tan Lungleiah Mizoram University Southern Campus din a nih theih nan hmalak mek a nih thu a sawi bawk.

Building pathum hawnna inkhawmah hian Lunglei HPC vice chairman S Lalding­liana, MLA leh Joseph Lalhimpuia, MLA-te pawhin thu an sawi.

Lunglei HPC sum hmanga sorkar in sakte hi cheng nuai 65.80 sênga sak Power & Electricity SE quarters, cheng nuai 48 sênga sak Lunglei Civil Hospital Medical Superintendent pisa leh nuai 45 sênga sak AH&Vety office-te a ni.