Minister-in bawlhhlawh báwm a vai liam

PHE minister Zodin­tluanga chuan November 25, Inrinni khan Swachh Bharat Mission (Gramin) hmalaknain Serchhipa PHE pisa tualah khaw 45-a sem tur community dustbin (bawlhhlawh báwm) 400 a vai liam.

Zodintluanga chuan, faina kawnga hmasawnna atan sorkar laipuiin nasa takin hma a la zel tih sawiin, "Hmalak a nih hma pawha Faina Hapta kum tam tak lo kalpui tawh kan ni a, faina kawng­ah hmasawnna hmel kan hmu zel a, a lawm­awm hle. Serchhip district hi páwn lama inthiar awm lohna, open defecation free (ODF) ni hmasa pawl a ni hi a chhuanawm a, thawktute inpekna a fakawm hle a ni," a ti.

PHE Minister chuan, faina kawnga chak zawka hmalak zel a nih theih nan Aizawl khawlaia bawlhhlawh paihte hrem theihna dan siam a nih tawh thu leh, a bawhzuina kawng­ah chak taka hmalak zel a nih thu a sawi bawk.

Minister of state Vanlal­awmpuii Chawngthu pawhin thu sawiin, bawlh­hlawh báwm sem turte chu ṭangkai taka hman a nih ngei a beisei thu a sawi a, "Faina atan pawimawh bik kan awm lo a, kan zavaiin kan pawimawh dan a inang vek a, kan ṭanrual a ṭul," a ti.

Serchhipa PHE executive engineer F Lal­sanglura sawi danin, Serchhip district-a khaw pasarihah bawlhhlawh paihna (burial ground) siam a ni a, khaw pakhatah siam zawh tawh niin, kha paruk dangah siam mek a ni. Thing­tlang khuaa chhung tinin bawlh­hlawh báwm ṭha an neih theih nan hmalak a ni a; Keiṭumah bawlhhlawh báwm 455, Bungtlangah 457 leh Buangpuiah 113 sem a ni tawh a, khaw 35-ah a tahtawla la sem zel tum a ni.