Serchhip YMA-in ramri veng dawn

YMA Sub-Headquarters, Serchhip hruaitu eng emaw zat chu Covid-19 laka Mizoram a him theihna turin Serchhip district chhunga Myanmar ramri véng turin nimin zing khan Serchhip aṭangin an chhuak.

Ramri venga duty turte thlahna inkhawm chu Serchhip Bazar Traffic Point-ah neih niin, district bawrh­sap Dr Lalzirmawia Chhangte-in a vai liam a ni. DC chuan, Mizoram himna tura ramri vengtute pui tura Ser­chhip Sub-Hqrs. YMA hruaitute an che chhuak chu lawmawm a tih thu a sawi a; sorkar leh task force-te'n ruahmanna an siamte chu zâwm hrâm tum turin mipui a ngen nghal bawk.

Serchhip Sub-Hqrs. YMA huam chhungah Myanmar nena ramri km. 14 vela thui a awm a, chu'ngahte chuan Sailulak Branch YMA leh Lungkawlh Branch YMA-te an duty mek a; chu'ng duty-te chu Serchhip lama YMA hruaitute'n an pui dawn a ni.