Pack House cum Market Shed hawng

Horticulture department-in Lawng­tlai Chandmary Venga Pack House cum Market Shed an siam thar chu November 25, Inrinni zing khan AH&Vety minister C Ngunlianchunga’n a hawng a; kut hnathawktute hnenah purûn sen, tomato leh zîkhlûm ṭiak a sem bawk.

C Ngunlianchunga chuan, Horticulture department-in kut hna­thawktute thlai thar chhuah thianghlim leh felfai zawka zawrh theihna tur hmun an siam chu lawmawm a tih thu a sawi rualin, thlai/thei tharte a chhiat mai loh nan a dahṭhatna tur (cold storage) ṭha tak pawh din theih thuai chakâwm a tih thu a sawi.

AH&Vety Minister chuan, kuttling­loa sum lak luh leh zawmthaw taka hna thawhah malsawmna dawn tur a awm lo tih sawiin, "Sorkar hnathawk emaw, kut hnathawk emaw pawhin mahni zawn ṭheuhah ram hmasawn nan thlan tui fara hna thawh a ṭul a ni," a ti.

Lawngtlaia Pack House cum Market Shed sak thar hi Mission for Integrated Development of Horticulture (MIDH) hnuai­a sak a ni a; thei leh thlai thar zuartute’n thiang­hlim leh tuihnai zawka an thil neihte an zawrh theihna tura ruahman a ni.