KHAWTHLIR

Rualbanlote Ni
Baptist Church of Mizoram chuan nimin khan 'Rualbanlote Ni' an hmang. Rualbanlote Ni pual hian BCM tualchhung kohhrante'n chawhma inkhawmah hun an hmang a, thupui chu 'Chhuak la, lamlianah te, dáiahte kal la, ka in khah nân mi han thlêm lût hrâm rawh' tih a ni.

Heroin man
Aizawl SP hnuaia District Special Branch-te chuan November 25, Inrinni chawhnu khan Ṭhuampuia helipad hnuaiah heroin hawng thum (gram 38.23) an man a, a neitua puh Rosiamliana (39) s/o Vanlalsiama, Tualbung nia inchhál an man nghal bawk. Rosiamliana lakah hian Bawngkawn Police Station-ah thubuai ziah luh a ni.

Poor Fund hlân
Christian High School, Lungleia kum 1982-a pawl 10 zirte chuan November 25, Inrinni khan Laldenga Park, Pukpuiah re-union an nei a, Christian Hospital, Serkawna Poor Fund atan Rs. 20,000 an hlan.

In kâng ral
November 24, Zirtawpni zan dar 11:30 vel khan Dinthar Veng, Aizawlah Lianvuli te chhungkaw chenna in, Assam type a kâng a, bungrua chuh hman lohin a kâng ral. In kâng neitute hi Dinthar khawtlang chuan Inrinni khan in an sak ṭhatsak ṭan nghal a, vawiinah an chhunzawm ang.

Cultural Meet
Art & Culture department leh Chhingchhip Mualpui Branch YMA chuan November 24, Zirtawpni khan Chhingchhip Mualpuiah Cultural Meet an buatsaih a, Art & Culture director R Hmingthanzuala'n a hawng. Cultural Meet-ah hian Chhingchhip bakah, Seling leh Serchhip Group YMA aṭangin hnam làmte entir a ni a, zaithiamte an zai bawk.

YMA training
YMA, Chhimphei Group chuan November 25, Inrinni khan Muallungthu community hall-ah Leadership Training an buatsaih a, Central YMA finance secretary Fabian Lalfakawma'n a hmanpui. Training-ah hian Chhimphei group chhunga YMA branch 10 aṭangin YMA hruaitute an tel a; CYMA vice president R Lalngheta paper buatsaih zirho a ni.

BCM SS zirlaibu
Baptist Church of Mizoram (BCM)-in kum 2018-a Sunday School zirlaibu tur, Beginner aṭanga Senior-A thlengte zir tur chu an chhu zo tawh a, BCM Bookshop-ah lei theih a ni tawh tih an tarlang. Senior-B zirlaibu tur pawh chhut mek a nih thu leh peih thuai beisei a nih thu an tarlang bawk.