MNF-in sum thawh turin INC MLA an ngen

MNF party chuan nimin khan thuchhuah siamin, Congress party MLA-te chu Covid-19 dona atana sum thawh ui-ah an puh a, chutih rualin, ui viau mahse sum thawh ve hrâm turin an ngen tih an tarlang. MLA zingah báng tur an awm a nih chuan, Zodintluanga Ralte chu báng tura an ngaih thu an sawi bawk.

MNF chuan, ZPM, BJP leh MNF party MLA-te’n Covid-19 dona atan May aṭanga December thleng, thla tin an basic pay aṭanga 30% thawh an rèl bakah, Chief Minister-in thla tin Rs. 20,000, Speaker, minister, deputy speaker leh govt. deputy chief whip-te’n thla tin Rs. 15,000 ṭheuh thawh belh an rêl a, “ZPM, BJP leh MNF legislature party aiawhte hian phal takin MLA fund 2020-21 aṭangin cheng nuai 50 ṭheuh thawh an rel bawk,” an ti.

Congress party MLA-te erawh chuan hripui do nan sum thawh an hreh hle nia sawiin MNF chuan, “Chhuanlam hrang hrang an siam reng. Sum thawh an hreh viau hi a àwm lo hran lo, mahni sahmîm puarna chauh ngaihtuah, dâwt leh thu dik chanvea mi dangte bei ṭhin, mipuiin harsatna an tawh lai pawha tlanchhiaa mawh kan phur lo, ti ṭhinte an ni,” an ti a; Congress party leh an MLA-te chu hripui lèn ṭan aṭanga tun thlenga politics-a hlâwkna zawng ngar ngarah an puh.

MNF chuan nimina press release dang an chhuahah, Assembly speaker Lalrinliana Sailo chu Congress party-a Communication department-in báng tura an phût avangin an chhan a; “Báng tur an awm a nih chuan a MLA-puite phatsan a, mipuite dâwt hrilhtu Pu Zodintluanga hi a báng zawk tur a ni,” an ti.

Assembly Speaker chuan BJP, ZPM leh MNF party MLA-te’n Covid-91 dona atan sum thawh an duh angin a kal tlangpui mai nia sawiin, MNF chuan, “Chu chu party pakhat Congress party hian a dodal ta mai zawk a ni,” an ti a; May 4, 2020-a meeting-a an sawite chu an chhinchhiah (minute) thlap thu leh chumi chungchangah chuan Zodintluanga’n dâwt a sawi niin an tarlang.

MNF tarlan danin, May 4, 2020-a legislature party leader ṭheuhte Speaker hoa an meeting minute a awm a; minute-ah chuan, ‘Member kal khawmte chuan Covid-19 hri léng dona, invenna leh hri léng avanga chhawmdawlna atana MLA hlawh leh MLALADS Fund-te pawh a ṭul anga thawh an inhuam thu sawiin, a situation azira MLA hlawh leh local fund aṭanga pek chungchang chu a ṭul anga la ngaihtuah ni se, mahni legislature party ṭheuhah lo sawiho turin lungrual takin rèl a ni,’ tia ziah a ni. Minute chu MLA-te an sem niin an sawi.